கோலாலம்பூர், மே 6: ஹரி ராயா விடுமுறை முடிந்து நகரவாசிகள் தங்கள் வீடுகளுக்குத் திரும்பத் தொடங்குவதால், வடக்கு மற்றும் கிழக்கில் இருந்து கிள்ளான் பள்ளத்தாக்கு நோக்கிய போக்குவரத்து இன்று நண்பகல் வரையும் நெரிசல் மிகுந்து காணப்பட்டது.
மலேசிய நெடுஞ்சாலை ஆணையத்தின் (LLM) செய்தித் தொடர்பாளர் கூறுகையில், வடக்கிலிருந்து கிள்ளான் பள்ளத்தாக்கு, பெர்தாமில் இருந்து சுங்கை டூவா டோல் பிளாசா, பெர்மாத்தாங் பாவில் இருந்து செபெராங் ஜெயா மற்றும் ஜூருவில் இருந்து ஜூரு டோல் பிளாசா வரை நெரிசல் ஏற்பட்டது.
"அதுமட்டுமின்றி, புக்கிட் தம்புனில் இருந்து பண்டார் காசியா, அலோர் பொங்சுவில் இருந்து புக்கிட் மேரா, சங்காட் ஜெரிங்கில் இருந்து புக்கிட் பெராபிட், கோலா காங்சாரில் இருந்து ஓய்வுப் பகுதி மற்றும் சுங்கை பேராக் ஓய்வுமையம் வரை மெனோரா சுரங்கம், ஈப்போவில் இருந்து கோப்பெங் மற்றும் பிடோரில் இருந்து ஸ்லிம் ரிவர் வரை நெரிசல் பதிவாகியுள்ளது," என்று அவர் பெர்னாமாவிடம் கூறினார்.
செய்தித் தொடர்பாளரின் கூற்றுப்படி, கிழக்கு கடற்கரையில் இருந்து போக்குவரத்து நெரிசல், பெந்தோங் டோல் பிளாசாவை நோக்கியும், பெந்தோங் டோல் பிளாசாவுக்குப் பிறகு புக்கிட் திங்கியை நோக்கியும் நெரிசல் ஏற்பட்டது.
எவ்வாறாயினும், செடெனாக்கில் இருந்து சிம்பாங் ரெங்காம் நோக்கி மட்டுமே நெரிசல் என்பதால் தெற்கிலிருந்து கிள்ளான் பள்ளத்தாக்குக்கான போக்குவரத்து கட்டுப்பாட்டில் இருப்பதாக அவர் கூறினார்.
"இரவு வரை நெரிசல் நீடிக்கும் என்று மலேசிய நெடுஞ்சாலை ஆணையம் எதிர்பார்க்கிறது மற்றும் பயனர்கள் தங்கள் பயணத்தை முன்கூட்டியே திட்டமிடுமாறு அறிவுறுத்தப்படுகிறார்கள்," என்று அவர் கூறினார்.
