புக்கிட் காத்தில், நவ.14: மலாக்கா தேர்தலில் இன்று காலை முதலே வாக்காளர்கள் ஆர்வத்துடன் வாக்களித்து வருகின்றனர்.
இந்த உற்சாகமான வாக்குப்பதிவு நிலை மாலை 6 மணி வரை தொடர்ந்து நீடிக்கும் என பக்காத்தான் ஹராப்பான் (PH) மலாக்கா மாநிலத் தலைவர் டத்தோஸ்ரீ அட்லி சாஹாரி நம்பிக்கை தெரிவித்துள்ளார்.
இன்று நண்பகல் வரையிலான நிலவரப்படி, பல வாக்குச்சாவடிகளில் 30 விழுக்காட்டிற்கும் அதிகமான வாக்காளர்கள் தங்களது வாக்குகளைப் பதிவு செய்துள்ளதாக அவர் குறிப்பிட்டார்.
காலை 7.30 மணிக்கு வாக்குப்பதிவு மையங்கள் திறக்கப்பட்டதிலிருந்தே பொதுமக்கள் ஆர்வத்துடன் வரிசையில் காத்திருந்து வாக்களித்து வருவது, ஜனநாயகக் கடமையை நிறைவேற்றுவதில் மக்களிடையே அதிகரித்துள்ள விழிப்புணர்வைக் காட்டுவதாகவும் அவர் தெரிவித்தார்.
இன்று காலை புக்கிட் காத்தில் அமைந்துள்ள ஜாலான் டத்தோ பலேம்பாங் தேசியப் பள்ளி வாக்குப்பதிவு மையத்தைப் பார்வையிட்ட பின்னர் செய்தியாளர்களிடம் பேசியபோது அவர் இதனைத் தெரிவித்தார்.
மேலும், தேர்தல் ஆணையம் (SPR) வெளியிடும் வாக்குப்பதிவு சதவீதம் தொடர்பான தரவுகள் மிகவும் பயனுள்ளதாக இருப்பதாகக் குறிப்பிட்ட அவர், இணையவழியில் வாக்குப்பதிவு நிலவரம் மற்றும் வாக்களித்தவர்களின் எண்ணிக்கையை உடனுக்குடன் அறிந்துகொள்ளும் வசதியை ஏற்படுத்தியதற்காகத் தேர்தல் ஆணையத்திற்கும் நன்றி தெரிவித்தார்.
இந்த வசதி, வாக்காளர்கள் தங்களது வாக்களிக்கும் நேரத்தைத் திட்டமிட்டு, வாக்குச்சாவடிகளுக்குச் சென்று தங்களது வாக்குகளைப் பதிவு செய்ய உதவுவதாகவும் அவர் கூறினார்.







