ஜெர்தே, அக். 18 – 1983ஆம் ஆண்டின் போதைப்பொருள் சார்ந்திருப்போர் (சிகிச்சை மற்றும் மறுவாழ்வு) சட்டத்தில் மேற்கொள்ளப்பட்ட திருத்தங்கள் பலனளிக்கத் தொடங்கியுள்ளன.
தேசிய போதைப்பொருள் தடுப்பு முகமையான AADK-வில் தன்னார்வ அடிப்படையில் சிகிச்சை மற்றும் மறுவாழ்வு பெற முன்வருவோரின் எண்ணிக்கை மாதத்திற்கு சராசரியாக 232ஆக அதிகரித்துள்ளது.
இதனை உள்துறை அமைச்சர் டத்தோ ஸ்ரீ சைஃபுடின் நசுத்தியோன் இஸ்மாயில் தெரிவித்தார்.
கடந்த 2025ஆம் ஆண்டு ஆகஸ்ட் 22ஆம் தேதி சட்டத் திருத்தங்கள் அமலுக்கு வருவதற்கு முன்னர், தன்னார்வ அடிப்படையில் சிகிச்சை பெற முன்வருவோரின் எண்ணிக்கை மாதத்திற்கு சராசரியாக 75ஆக இருந்ததாக அவர் கூறினார்.
இந்தச் சட்டத் திருத்தங்கள் அமலுக்கு வந்தது முதல், கடந்த அக்டோபர் 11ஆம் தேதி வரை, நாடு முழுவதும் AADK சேவைகளைப் பெற்ற 45,999 பேரில் 2,335 பேர் தாங்களாகவே முன்வந்து சிகிச்சை மற்றும் மறுவாழ்வு பெறத் தேர்வு செய்துள்ளதாக அவர் குறிப்பிட்டார்.
அவர்களில் 1,595 பேர் சமூக அடிப்படையிலான சிகிச்சை மற்றும் மறுவாழ்வைப் பெற்றுள்ளனர். மேலும் 740 பேர் போதைப்பொருள் மறுவாழ்வு மையங்களான PUSPEN-இல் தங்கியிருந்து சிகிச்சை பெற்று வருகின்றனர்.
இன்று ஃபெல்டா தெனாங்கில் நடைபெற்ற AADK-வின் MADANI தத்தெடுப்பு கிராமம் மற்றும் தத்தெடுப்பு பள்ளித் திட்டத்தைத் தொடக்கி வைத்த பின்னர் செய்தியாளர்களிடம் பேசிய அவர், சட்டத் திருத்தத்தின் நோக்கம் மற்றும் அதன் தாக்கம் குறித்துப் பேசினார். இந்நிகழ்ச்சியில் AADK தலைமை இயக்குநர் டத்தோ ருஸ்லின் ஜூசோவும் கலந்துகொண்டார்.
ஆண்டின் 283ஆவது சட்டத்தில் மேற்கொள்ளப்பட்ட திருத்தங்கள், குற்றவியல் தண்டனை அணுகுமுறையிலிருந்து விலகி, தன்னார்வ சிகிச்சை மற்றும் மறுவாழ்வுக்கு முக்கியத்துவம் அளிக்கும் புதிய அணுகுமுறையை உருவாக்கும் என்ற எதிர்பார்ப்பு தற்போது உறுதிப்படுத்தப்பட்டுள்ளது
தன்னார்வமாக முன்வந்து சிகிச்சை பெறுபவர்களுக்கு குற்றப் பதிவேடு ஏற்படாது. இதனால், நீதிமன்றத்தின் கட்டாய உத்தரவுகளுக்கும் சமூக அவமதிப்புக்கும் அஞ்சாமல் அவர்கள் சிகிச்சை பெற முன்வர முடிகிறது.
மேலும், AADK-வின் சேவைகளைத் தன்னார்வ அடிப்படையில் நாடி வருவோரில் பெரும்பாலானோர் பதின்ம வயதினர் என்றும், அவர்களில் சிலரைப் பெற்றோர் சிகிச்சைக்காக அழைத்து வருவதாகவும், மற்றவர்கள் தாங்களாகவே மறுவாழ்வு பெற முன்வருவதாகவும் சைஃபுடின் கூறினார்.
தன்னார்வ சிகிச்சை பெறுவோரின் எண்ணிக்கை அதிகரித்துள்ள போதிலும், அவர்களுக்குத் தேவையான சிகிச்சை மற்றும் மறுவாழ்வு சேவைகளை வழங்குவதற்குப் போதுமான வசதிகள், நிதி ஒதுக்கீடு மற்றும் பணியாளர்கள் AADK-விடம் இருப்பதாகவும் அவர் உறுதியளித்தார்.
போதைப்பொருள் தடுப்பு நடவடிக்கைகளை வலுப்படுத்த AADK–FELDA ஒத்துழைப்பு
இதற்கிடையில், நாடு முழுவதும் உள்ள 300க்கும் மேற்பட்ட ஃபெல்டா குடியேற்றப் பகுதிகளில் போதைப்பொருள் தடுப்பு, சிகிச்சை மற்றும் மறுவாழ்வு நடவடிக்கைகளை வலுப்படுத்துவதற்காக AADK மற்றும் FELDA ஆகியவை புரிந்துணர்வு ஒப்பந்தத்தில் கையெழுத்திடவுள்ளதாகவும் சைஃபுடின் தெரிவித்தார்.
இந்த ஒத்துழைப்பு நான்கு முக்கிய அம்சங்களை அடிப்படையாகக் கொண்டிருக்கும். அவை, போதைப்பொருள் தடுப்பு மற்றும் பொதுமக்களிடையே விழிப்புணர்வை ஏற்படுத்துதல், சமூக அடிப்படையிலான சிகிச்சை மற்றும் மறுவாழ்வு, பொருளாதார மற்றும் சமூக வலுவூட்டல், அத்துடன் தரவு மற்றும் தகவல்களைப் பகிர்ந்துகொள்ளுதல் ஆகியவையாகும்.
போதைப்பொருள் பயன்பாடு தீவிரமடைவதற்கு முன்பே தடுப்பு நடவடிக்கைகளை மேற்கொள்வதே இந்த ஒத்துழைப்பின் முக்கிய நோக்கம் என அவர் குறிப்பிட்டார்.
