கோலாலம்பூர், அக்.16 – மானிய விலையில் பெட்ரோல் கிடைப்பது, பொதுப் போக்குவரத்தைப் பயன்படுத்துவதைவிடத் தனியார் வாகனங்களைப் பயன்படுத்துவதற்கு மக்களை அதிகம் ஊக்குவிக்கிறது.
இருப்பினும், பெட்ரோல் மானியத்தை ரத்து செய்வது போன்ற கொள்கை மாற்றங்களை மேற்கொள்ளும்போது, மக்களின் வாழ்க்கைச் செலவினங்கள் மற்றும் நாட்டின் ஒட்டுமொத்தப் பொருளாதாரத்தின் மீதான தாக்கங்கள் ஆகியவற்றைக் கருத்தில் கொள்ள வேண்டியது அவசியம் என சிலாங்கூர் மாநில முதலீடு, வர்த்தகம் மற்றும் போக்குவரத்து துறை ஆட்சிக்குழு உறுப்பினர் இங் சீ ஹான் தெரிவித்தார்.
குறிப்பாக, குறைந்த வருமானம் பெறும் மக்களில் பலர் தங்களது அன்றாடப் போக்குவரத்துத் தேவைகளுக்குத் தனியார் கார்களை நம்பியிருப்பதாக அவர் சுட்டிக்காட்டினார்.
அதிலும், போதுமான பொதுப் போக்குவரத்து வசதிகள் இல்லாத பகுதிகளில் வசிப்பவர்களுக்கு, தனியார் வாகனங்கள் அத்தியாவசியத் தேவையாக இருப்பதாக அவர் குறிப்பிட்டார்.
எனவே, தனியார் வாகனப் பயன்பாட்டைக் குறைத்து, பொதுப் போக்குவரத்தை அதிகமான மக்கள் பயன்படுத்துவதை ஊக்குவிக்கும் முயற்சிகள் சமநிலையான அணுகுமுறையுடன் முன்னெடுக்கப்பட வேண்டும்.
இத்தகைய நடவடிக்கைகள் மலேசியர்களின் அன்றாடப் பயணத் தேவைகளையும் அவர்களது வாழ்வாதாரத்தையும் பாதிக்காத வகையில் அமைவது முக்கியம்.
கோலாலம்பூர் மாநாட்டு மையத்தில் நடைபெற்ற சிலாங்கூர் சர்வதேச வர்த்தக உச்சி மாநாட்டை (SIBS) முன்னிட்டு ஏற்பாடு செய்யப்பட்ட சிலாங்கூர் போக்குவரத்து கருத்தரங்கின் கலந்துரையாடல் நிகழ்ச்சியில் பங்கேற்றபோது இங் சீ ஹான் இதனைத் தெரிவித்தார்.
இதற்கிடையில், சிலாங்கூரில் பரந்து விரிந்துள்ள நகரக் குடியிருப்புப் பகுதிகள், பொதுப் போக்குவரத்தைப் பயன்படுத்தும் பயணிகளுக்கான ஆரம்ப மற்றும் இறுதிக்கட்டப் போக்குவரத்து இணைப்பில் பெரும் சவால்களை ஏற்படுத்துகின்றன.
பயணிகள் தங்களது வீடுகள் மற்றும் குடியிருப்புப் பகுதிகளிலிருந்து பேருந்து அல்லது ரயில் நிலையங்களை எளிதில் சென்றடைவதற்கும், அங்கிருந்து தங்களது இறுதி இலக்கை அடைவதற்கும் ஏற்ற வசதிகளை மேம்படுத்த வேண்டியதன் அவசியத்தை அவர் வலியுறுத்தினார்.
குறிப்பாக, தரமான நடைபாதைக் கட்டமைப்புகளை உருவாக்குவதுடன், பொதுப் போக்குவரத்தைச் சென்றடைவதற்கான மாற்று வழிகளையும் ஏற்படுத்த வேண்டும் என்றார்.
சிங்கப்பூர், தைப்பே போன்ற நகரங்களுடன் ஒப்பிடுகையில், சிலாங்கூரின் நகர்ப்புற வளர்ச்சி முறை வேறுபட்டிருப்பதாகக் குறிப்பிட்ட அவர், அந்நகரங்களில் காணப்படும் நகரமைப்பு, பொதுப் போக்குவரத்துடன் சிறந்த இணைப்பை ஏற்படுத்துவதற்கு ஏற்றதாக இருப்பதாகத் தெரிவித்தார்.
பொதுப் போக்குவரத்து வசதிகளை எளிதில் சென்றடைவதற்கு நடைப்பயணம் மற்றும் குறுந்தொலைவு இலகு போக்குவரத்து முறைகள் உள்ளிட்ட மாற்று வழிகளைப் பயன்படுத்த முடியும். எனினும், இத்தகைய தீர்வுகளை நடைமுறைப்படுத்தும்போது மலேசியாவின் உள்ளூர் சூழ்நிலைகளையும் கருத்தில் கொள்ள வேண்டியது அவசியம்.
குறிப்பாக, நாட்டின் காலநிலை, மக்களின் கலாச்சாரப் பழக்கவழக்கங்கள் மற்றும் அன்றாட வாழ்க்கை முறை ஆகியவற்றுக்கு ஏற்ற வகையில் நடைபாதை வசதிகள் திட்டமிடப்பட வேண்டும் என இங் சீ ஹான் சுட்டிக்காட்டினார்.
