ஷா ஆலாம், அக். 11 — கோத்தா டாமான்சாரா தொகுதியைச் சேர்ந்த சுமார் 100 குடியிருப்பாளர்களுடன் நேரடியாகச் சந்திப்பு நடத்தி, அவர்களின் கருத்துகள், கோரிக்கைகள் மற்றும் உள்ளூர் சமூகத்தின் தேவைகளைக் கேட்டறியும் நிகழ்ச்சி நடைபெற்றது.
கோத்தா டாமான்சாரா சட்டமன்ற உறுப்பினர் இஸுவான் காசிம் பங்கேற்ற இந்நிகழ்ச்சி, மக்களுடன் நேரடியாகத் தொடர்புகொண்டு அவர்களின் பிரச்சனைகளை அறிந்துகொள்வதுடன், மக்கள் பிரதிநிதிகளுக்கும் பொதுமக்களுக்கும் இடையிலான உறவை மேலும் வலுப்படுத்தும் நோக்கத்தைக் கொண்டிருந்தது.
கோத்தா டாமான்சாரா சட்டமன்றத் தொகுதியின் பெண்கள் மேம்பாட்டு மையம் (PWB) ஏற்பாட்டில் (Program Bersama YB: Mendengar, Menyantuni dan Memperkasa Komuniti) என்ற கருப்பொருளில் அமைந்த இந்நிகழ்ச்சி, சுபாங் பெர்மாயில் உள்ள செமாரா மண்டபத்தில் நேற்று நடைபெற்றது.
சமூக நலன் மற்றும் பெண்களின் ஆற்றல்மிக்க முன்னேற்றம் தொடர்பான விவகாரங்களில் மக்களின் தேவைகளை நேரடியாக அறிந்து, அதற்கேற்ப நடவடிக்கைகளை முன்னெடுப்பது அவசியம் என்றும் இந்நிகழ்ச்சியில் இஸுவான் வலியுறுத்தினார்.
