ஷா ஆலாம், அக். 5 — ஷா ஆலாம் நகருக்கு தனிப்பட்ட சுற்றுலா கைப்பேசி செயலி அறிமுகப்படுத்தப்பட உள்ளது. இதற்கான மேம்பாட்டுப் பணிகள் தற்போது 80 விழுக்காடு நிறைவடைந்துள்ள நிலையில், அடுத்த ஆண்டு தொடக்கத்தில் செயலி பயன்பாட்டுக்கு வரும் என எதிர்பார்க்கப்படுகிறது.
மாநகராட்சியின் தற்போதைய சுற்றுலா போர்ட்டலை அடிப்படையாகக் கொண்டு இந்த புதிய செயலி உருவாக்கப்பட்டு வருவதாக ஷா ஆலாம் மாநகராட்சி (MBSA) சமூக மேம்பாட்டுத் துறை இயக்குநர் ஷாரின் அஹ்மட் தெரிவித்தார்.
ஷா ஆலாமில் உள்ள முக்கியமான சுற்றுலா தலங்கள் மற்றும் பிரபலமான இடங்கள் குறித்த தகவல்கள் இந்தச் செயலியில் இடம்பெறும்.
MBSA-வின் இலக்கமயமாக்கல் துறையுடன் இணைந்து சமூக மேம்பாட்டுத் துறை இந்தச் செயலிக்கான பணிகளை மேற்கொண்டு வருவதாகவும் ஷாரின் தெரிவித்தார்.
பிரபலமான சுற்றுலா தலங்களின் பட்டியலுடன், குடிநுழைவுத் துறை அலுவலகம், ஷா ஆலாம் மருத்துவமனை மற்றும் மருந்தகங்கள் அமைந்துள்ள இடங்கள் உள்ளிட்ட அத்தியாவசிய தகவல்களும் இந்த செயலியில் இடம்பெறும்.
அவசரகாலங்களில் பொதுமக்கள் மற்றும் சுற்றுலாப் பயணிகள் உடனடியாக உதவியை நாடும் வகையில் முக்கியமான அவசரத் தொலைபேசி எண்களும் செயலியில் வழங்கப்படும்.
கடந்த ஆண்டு ஷா ஆலாம் நகருக்கு சுமார் 1.3 மில்லியன் சுற்றுலாப் பயணிகள் வருகை தந்துள்ளனர். இது 2024ஆம் ஆண்டில் பதிவான 747,576 பேருடன் ஒப்பிடுகையில் சுமார் 74 விழுக்காடு அதிகரிப்பாகும்.
ஷா ஆலாமின் முக்கிய சுற்றுலா ஈர்ப்புகளில் தேசிய தாவரவியல் பூங்கா ஷா ஆலம், சுல்தான் சலாஹுத்தீன் அப்துல் அசீஸ் ஷா பள்ளிவாசல் மற்றும் ஐ-சிட்டி ஆகியவை அடங்குவதாக ஷாரின் குறிப்பிட்டார்.
