ஷா ஆலாம், ஜூலை 15: சிலாங்கூர் மாநிலத்தின் உலு சிலாங்கூர் மாவட்டத்தில் இன்று மாலை 5.00 மணி வரை இடிமின்னலுடன் கூடிய கனமழை பெய்யக்கூடும் என மலேசிய வானிலை ஆய்வு மையம் (MetMalaysia) எச்சரிக்கை விடுத்துள்ளது.
பேராக் , கிளந்தான், திராங்கானு, பகாங், நெகிரி செம்பிலான், ஜோகூர், சரவாக் மற்றும் சபா ஆகிய மாநிலங்களில் உள்ள சில பகுதிகளுக்கும் இதே போன்ற வானிலை எச்சரிக்கை விடுக்கப்பட்டுள்ளது.
ஒரு மணி நேரத்திற்கு 20 மில்லிமீட்டருக்கும் அதிகமான மழைப்பொழிவு பதிவாகும்போதும் அல்லது அந்த அளவிலான மழை ஒரு மணி நேரத்திற்கும் மேலாகத் தொடரும் என எதிர்பார்க்கப்படும்போதும் இத்தகைய எச்சரிக்கைகள் விடுக்கப்படுவதாக வானிலை ஆய்வு மையம் வெளியிட்ட அறிக்கையில் தெரிவித்துள்ளது.
இந்த எச்சரிக்கையானது, அதிகபட்சமாக ஆறு மணி நேரத்திற்கு மிகாமல் செல்லுபடியாகும் ஒரு குறுகிய கால வானிலை முன்னறிவிப்பு என்றும் அந்த முகமை விளக்கியுள்ளது.
எனவே, பாதிக்கப்பட்ட பகுதிகளில் வசிக்கும் பொதுமக்கள் அனைவரும் எப்போதும் விழிப்புடன் இருக்குமாறும், வானிலை ஆய்வு மையம் அவ்வப்போது வெளியிடும் அண்மைக்கால வானிலை தகவல்களைத் தொடர்ந்து கண்காணிக்குமாறும் கேட்டுக்கொள்ளப்படுகிறார்கள்.
