ஷா ஆலாம், ஜூலை 10 – ரவாங், புக்கிட் பெருந்தோங்கில் உள்ள டாலியா அடுக்குமாடி குடியிருப்பின் தரைத்தளத்தில் நேற்று மாலை ஏற்பட்ட பயங்கரத் தீ விபத்தில், வீடொன்று ஏறக்குறைய 90 விழுக்காடு முற்றிலும் எரிந்து சாம்பலானது.
இச்சம்பவம் குறித்து நேற்று மாலை 7.08 மணியளவில் தங்களுக்கு அவசர அழைப்பு வந்ததாக சிலாங்கூர் தீயணைப்பு மற்றும் மீட்புத்துறையின் செயல்பாட்டு உதவி இயக்குனர் அஷ்ருல் ரிசால் அஸ்பார் தெரிவித்துள்ளார்.
அழைப்பு வந்த உடனே, புக்கிட் செந்தோசா தீயணைப்பு மற்றும் மீட்பு நிலையத்தைச் சேர்ந்த ஒரு குழுவினர், ரவாங் தீயணைப்பு நிலைய ஊழியர்களின் உதவியுடன் உடனடியாகச் சம்பவ இடத்திற்கு விரைந்தனர்.
மாலை 7.20 மணியளவில் சம்பவ இடத்திற்கு வந்தடைந்த தீயணைப்பு வீரர்கள், நான்கு மாடிகளைக் கொண்ட அந்த அடுக்குமாடி குடியிருப்பின் தரைத்தளத்தில் உள்ள, சுமார் 15-க்கு 60 சதுர அடி பரப்பளவு கொண்ட ஒரு வீடானது கொழுந்துவிட்டு எரிந்து கொண்டிருந்ததைக் கண்டறிந்தனர்.
மாலை 7.43 மணியளவில் தீ முற்றிலும் கட்டுப்பாட்டுக்குள் கொண்டு வரப்பட்டது. இருப்பினும், அந்த வீடு சுமார் 90 விழுக்காடு சேதமடைந்துள்ளதாக மதிப்பிடப்பட்டுள்ளது.
அதிர்ஷ்டவசமாக இந்த சம்பவத்தில் யாருக்கும் காயங்களோ அல்லது உயிர்ச்சேதமோ ஏற்படவில்லை.
இந்தத் தீ விபத்து ஏற்பட்டதற்கான துல்லியமான காரணம் குறித்து அதிகாரிகள் இன்னும் தீவிர விசாரணை நடத்தி வருகின்றனர்.
