பெட்டாலிங் ஜெயா, ஜூன் 24: மலேசிய இந்திய சமூகத்தின் கல்வி வாய்ப்புகளை மேம்படுத்துவதற்காக 'பெராபோட் மடாணி' (Perabot Madani) மற்றும் 'கல்வி மடாணி' (Kalvi Madani) ஆகிய இரு புதிய திட்டங்களின் கீழ் அரசாங்கம் 20.8 மில்லியன் ரிங்கிட் நிதியை ஒதுக்கியுள்ளது.
நாடு தழுவிய அளவில் 50,000-க்கும் மேற்பட்ட இந்திய மாணவர்கள் இந்த திட்டங்களின் மூலம் பயன்பெறுவார்கள் என்று மனிதவள அமைச்சர் ரமணன் தெரிவித்துள்ளார்.
மலேசிய இந்திய உருமாற்றுப் பிரிவின் (மித்ரா) கீழ் செயல்படுத்தப்படும் இந்தத் திட்டங்கள், இந்திய மாணவர்கள் கல்வித்துறையில் பின்தங்கிவிடக் கூடாது என்பதை உறுதி செய்வதற்கான அரசாங்கத்தின் நீண்டகால அர்ப்பணிப்பை வெளிப்படுத்துகின்றன என ரமணன் குறிப்பிட்டார்.
நாடு முழுவதும் உள்ள 361 அரசு உதவிபெறும் தமிழ்ப்பள்ளிகளுக்குத் தேவையான தளவாடப் பொருட்கள் மற்றும் கல்வி வசதிகளை வழங்குவதற்காகப் 'பெராபோட் மடாணி' திட்டத்தின் கீழ் 12.8 மில்லியன் ரிங்கிட் நிதி ஒதுக்கப்பட்டுள்ளது.
இந்தத் திட்டத்தின் மூலம் மேசைகள், நாற்காலிகள், ஆசிரியர் அறை உபகரணங்கள், கரும்பலகைகள் மற்றும் கணினி ஆய்வகத் தளவாடங்கள் ஆகியவை வழங்கப்பட்டு, 39,692 மாணவர்களும் 5,290 ஆசிரியர்களும் பயனடையவுள்ளனர்.
தரமான கல்வி என்பது ஒரு தரமான கற்றல் சூழலில் இருந்தே தொடங்க வேண்டும் என்பதால், மாணவர்கள் வசதியாகவும் ஆசிரியர்கள் திறம்படவும் செயல்படக்கூடிய ஒரு சாதகமான பள்ளிச் சூழலை உருவாக்கவே இந்த நடவடிக்கை எடுக்கப்பட்டுள்ளது என்று அவர் சுட்டிக்காட்டினார்.
அதே வேளையில், பி40 (B40) குறைந்த வருமானப் பிரிவு குடும்பங்களைச் சேர்ந்த சுமார் 10,410 மாணவர்களின் நலனுக்காக 8 மில்லியன் ரிங்கிட் செலவில் 'கல்வி மடாணி' திட்டம் தேர்ந்தெடுக்கப்பட்ட 315 தமிழ்ப்பள்ளிகளில் தரம் 4 முதல் தரம் 6 வரையிலான மாணவர்களுக்காகச் செயல்படுத்தப்படவுள்ளது.
இத்திட்டத்தின் கீழ் மலாய் மொழி, ஆங்கிலம், கணிதம் மற்றும் அறிவியல் ஆகிய பாடங்களுக்கு இலவசப் பிரத்தியேக வகுப்புகள் (Tuition) நடத்தப்படுவதோடு, ஊட்டச்சத்து உதவிகள், கற்றல் உபகரணங்கள் மற்றும் மின்னியல் சாதனங்களும் சம்பந்தப்பட்ட பள்ளிகளுக்கு வழங்கப்படும்.
மேலும், இத்திட்டத்தில் இணையும் ஒருங்கிணைப்பாளர்கள் மற்றும் பயிற்றுவிப்பாளர்களுக்கான கொடுப்பனவுகளும் இதன் மூலமாகவே நிதியளிக்கப்படும் என்று அவர் விளக்கமளித்தார்.
வறுமைச் சுழற்சியை உடைப்பதற்கும், நாட்டின் எதிர்காலத்திற்குப் பங்களிக்கக்கூடிய திறன்மிக்க, போட்டித்தன்மை வாய்ந்த இளைய தலைமுறையினரை உருவாக்குவதற்கும் கல்வியில் முதலீடு செய்வதே மிகச் சிறந்த மற்றும் பயனுள்ள வழியாகும் என ரமணன் வலியுறுத்தினார்.
