ஷா ஆலம், மே 6: ஊராட்சி மன்றங்களின் (PBT) கீழ் இயங்கும் வணிக வளாகங்களின் வாடகையைக் குறைப்பது தொடர்பாகப் பிரதமர் டத்தோ ஸ்ரீ அன்வார் இப்ராஹிம் முன்வைத்த ஆலோசனையைச் சிலாங்கூர் மாநில அரசு தீவிரமாகப் பரிசீலித்து வருகிறது.
இது குறித்து எதிர்வரவிருக்கும் மாநில செயற்குழுக் கூட்டத்தில் (EXCO) விரிவாக விவாதிக்கப்படும் என்று உள்ளூர் ஆட்சி மற்றும் சுற்றுலாத்துறைக்கான மாநிலச் செயற்குழு உறுப்பினர் டத்தோ இங் சுய் லிம் தெரிவித்தார்.
நேற்று உரையாற்றிய பிரதமர் அன்வார் இப்ராஹிம், தற்போதைய பொருளாதாரச் சூழலில் சிறு வணிகர்கள் மற்றும் வர்த்தகர்களின் சுமையைக் குறைக்க, மாநில அரசுகளும் ஊராட்சி மன்றங்களும் தங்களின் வணிக வளாகங்களின் வாடகைகளைக் குறைப்பது குறித்துப் பரிசீலிக்க வேண்டும் என்று கேட்டுக் கொண்டிருந்தார்.
இதன் தொடக்க நடவடிக்கையாக, மாரா (MARA) மற்றும் உடா ஹோல்டிங்ஸ் (UDA Holdings) போன்ற மத்திய அரசு நிறுவனங்களின் கீழ் உள்ள வளாகங்களில் இந்த மாதம் முதல் வாடகை குறைக்கப்படும் என்றும் அவர் அறிவித்திருந்தார்.
பிரதமரின் இந்த வேண்டுகோள் குறித்து ‘மீடியா சிலாங்கூர்’ ஊடகத்திற்குப் பேட்டியளித்த இங் சுய் லிம், "இந்த விவகாரம் நிதி ரீதியாகவும் பொருளாதார ரீதியாகவும் பெரிய தாக்கத்தை ஏற்படுத்தக்கூடியது.
எனவே, இது குறித்து ஆழமான ஆய்வும் விரிவான ஆலோசனையும் தேவைப்படுகிறது. எதிர்வரவிருக்கும் மாநில செயற்குழுக் கூட்டத்தில் இது ஒரு முன்மொழிவாகச் சமர்ப்பிக்கப்படும்," என்று கூறினார்.
ஊராட்சி மன்றங்களின் நிதி நிலைமை மற்றும் வணிகர்கள் மீதான பொருளாதாரத் தாக்கம் எனப் பல்வேறு கோணங்களில் இந்த ஆய்வு அமையும் என்று அவர் குறிப்பிட்டார்.
மேலும், புவிசார் அரசியல் மோதல்கள் மற்றும் எரிபொருள் விலை உயர்வு போன்ற உலகளாவிய காரணிகளால் வணிகத் துறை மட்டுமின்றி தனியார் துறையினரும் கடும் அழுத்தத்திற்கு உள்ளாகியிருப்பதை அவர் சுட்டிக்காட்டினார்.
"உலகளாவிய போர்கள் மற்றும் எரிபொருள் விலை ஏற்றம் அனைத்துத் துறைகளிலும் பாதிப்புகளை ஏற்படுத்தியுள்ளன. எனவே, எந்தவொரு முடிவையும் எடுப்பதற்கு முன்னதாக அதன் குறுகிய கால மற்றும் நீண்ட கால விளைவுகளை நாம் கவனமாக ஆராய வேண்டும்," என்றும் அவர் வலியுறுத்தினார்.
