சிப்பாங், மே 5: கோலாலம்பூர் பன்னாட்டு விமான நிலையத்தின் (KLIA) ஏரோட்ரெயின் (Aerotrain) சேவை, சம்பந்தப்பட்ட அதிகாரிகளிடமிருந்து முறையான அங்கீகாரம் கிடைத்த பிறகு, இந்த மாத இறுதிக்குள் மீண்டும் 24 மணி நேரமும் செயல்படும் என்று போக்குவரத்து அமைச்சர் அந்தோணி லோக் தெரிவித்துள்ளார்.
இதற்கான அனைத்து தொழில்நுட்ப சோதனைகளும் மலேசியா ஏர்போர்ட்ஸ் ஹோல்டிங்ஸ் பெர்ஹாட் (MAHB) நிறுவனத்தால் ஏற்கனவே செய்து முடிக்கப்பட்டுள்ளதாக அவர் குறிப்பிட்டார்.
தற்போது இந்தச் சோதனைகள் குறித்த முழுமையான அறிக்கை, பாதுகாப்பு அம்சங்களை ஆய்வு செய்வதற்காக நிலப் போக்குவரத்து பொது நிறுவனம் (APAD) வசம் ஒப்படைக்கப்பட்டுள்ளது. ஏபிஏடி (APAD) அமைப்பின் மதிப்பீடு மற்றும் அங்கீகாரம் கிடைத்தவுடன், இந்த மாத இறுதிக்குள் ஏரோட்ரெயின் சேவை முழுமையாக 24 மணி நேரமும் பொதுமக்களின் பயன்பாட்டிற்கு வரும் என்று எதிர்பார்க்கப்படுகிறது.
இன்று கே.எல்.ஐ.ஏ (KLIA) முனையத்தில் நடைபெற்ற புதிய பயண அட்டை அறிமுக விழாவிற்குப் பிறகு செய்தியாளர்களிடம் பேசிய அமைச்சர் இதனை உறுதிப்படுத்தினார்.
தற்போதைய நிலையில் ஏரோட்ரெயின் சேவை செயல்பாட்டில் இருந்தாலும், தண்டவாளப் பராமரிப்பு மற்றும் பாதுகாப்புச் சோதனைகளுக்காக நள்ளிரவு நேரங்களில் மட்டும் சில மணிநேரங்கள் தற்காலிகமாக நிறுத்தப்படுகிறது.
கடந்த ஆண்டு ஜூலை மாதம் இந்தச் சேவை மீண்டும் தொடங்கப்பட்டதிலிருந்து எழுந்த தொழில்நுட்பச் சிக்கல்களுக்கு நிரந்தரத் தீர்வு காண, விரிவான செயல் திட்டம் (CAP) ஒன்றின் மூலம் அமைப்பின் நம்பகத்தன்மையை வலுப்படுத்தப் போவதாக எம்.ஏ.எச்.பி (MAHB) நிறுவனம் ஏற்கனவே உறுதியளித்திருந்தது.
புள்ளிவிவரங்களின்படி, கடந்த ஜூலை 1 முதல் மீண்டும் செயல்படத் தொடங்கிய கே.எல்.ஐ.ஏ ஏரோட்ரெயின் சேவை இதுவரை சுமார் 70 லட்சம் பயணிகளைக் கையாண்டுள்ளதுடன், 53,000-க்கும் மேற்பட்ட பயணங்களை மேற்கொண்டுள்ளது.
இதில் சமிக்ஞை கோளாறுகள் மற்றும் பயணிகள் வலுக்கட்டாயமாகத் கதவுகளைத் திறக்க முயன்றது போன்ற காரணங்களால் சில இடையூறுகள் ஏற்பட்ட போதிலும், அதன் ஒட்டுமொத்த செயல்பாட்டுத் திறன் 98.41 விழுக்காடாகப் பதிவாகியுள்ளது குறிப்பிடத்தக்கது.
முழு நேரச் சேவை தொடங்குவதன் மூலம் பயணிகளின் காத்திருப்பு நேரம் குறைவதுடன், விமான நிலையத்தின் போக்குவரத்துத் தரம் மேலும் மேம்படும் என்று எதிர்பார்க்கப்படுகிறது.
