ஆபாச வீடியோ விற்பனை மோசடிக் கும்பல்: சீன நாட்டினர் நால்வர் கைது

சிரம்பான்: ஆபாச வீடியோக்களை விற்பனை செய்யும் இணைய மோசடிக் கும்பலில் ஈடுபட்டதாக சந்தேகிக்கப்படும் சீன நாட்டைச் சேர்ந்த நான்கு ஆடவர்களை போலீசார் கைது செய்துள்ளனர். இங்குள்ள ஒரு வீட்டில் கடந்த வாரம் நடத்தப்பட்ட சோதனையில் அவர்கள் பிடிபட்டனர்.

சிரம்பான் மாவட்டத் துணை போலீஸ் தலைவர், கண்காணிப்பாளர் அஹ்மத் லுத்பி அப்துல் முத்தலிப் கூறுகையில், 25 முதல் 40 வயதுக்குட்பட்ட சந்தேக நபர்கள் ஏப்ரல் 23ஆம் தேதி கைது செய்யப் பட்டதாகத் தெரிவித்தார். இந்த நடவடிக்கை சிரம்பான் மாவட்ட போலீஸ் தலைமையகம் (IPD) மற்றும் நெகிரி செம்பிலான் மாநில போலீஸ் தலைமையகத்தின் (IPK) வணிகக் குற்றப் புலனாய்வுத் துறையினரால் மேற்கொள்ளப்பட்டது.

"வாடிக்கையாளர்களை ஈர்ப்பதற்காக இந்தக் கும்பல் ஒரு இணையதளம் மூலம் ஆபாச வீடியோக்களை விளம்பரப்படுத்தி வந்துள்ளது. மேலும், டாங் டாங், டெலிகிராம் மற்றும் வீசெட் போன்ற செயலிகளையும் பயன்படுத்தியுள்ளது ஆரம்பக்கட்ட விசாரணையில் தெரியவந்துள்ளது," என்று அவர் இன்று வெளியிட்ட ஓர் அறிக்கையில் கூறினார்.

சோதனையின் போது, குற்றச் செயல்களுக்குப் பயன்படுத்தப் பட்ட நான்கு கணினிகள், பல்வேறு வகைகளைச் சேர்ந்த 19 கைபேசிகள், ஒரு திசைவி (router), சாவிகள் மற்றும் தொலைவியக்கிகள் ஆகியவற்றை போலீசார் பறிமுதல் செய்ததாக அவர் குறிப்பிட்டார். பறிமுதல் செய்யப்பட்ட பொருட்களின் மதிப்பு சுமார் 10,000 ரிங்கிட் என மதிப்பிடப் பட்டுள்ளது.

தண்டனைச் சட்டம், பிரிவு 420-இன் கீழ் விசாரணைக்கு உதவுவதற்காக சந்தேக நபர்கள் அனைவரும் இன்று வரை தடுத்து வைக்கப்பட்டுள்ளனர்.