கிள்ளான், ஏப்ரல் 11: மலேசியாவில் டீசல் விலை உயர்வு அமலுக்கு வந்துள்ளதைத் தொடர்ந்து, லாரி போக்குவரத்து நிறுவனங்கள் தங்களின் எரிபொருள் செலவினங்களைக் கட்டுப்படுத்த விநியோக அட்டவணையை மாற்றி அமைத்து வருகின்றன. இதனால் லாரி ஓட்டுநர்களின் தினசரி பணிகள் மற்றும் வருமானம் பாதிக்கப்பட்டுள்ளதாகத் தெரிய வந்துள்ளது.
இது குறித்து மேற்கொள்ளப்பட்ட கள ஆய்வின்படி, நுகர்வோருக்கான அத்தியாவசியப் பொருட்களின் விநியோகம் தடைபடாமல் இருக்க பெரும்பாலான நிறுவனங்கள் தொடர்ந்து இயங்கி வருகின்றன.
இருப்பினும், எரிபொருள் சிக்கனத்தைக் கருத்தில் கொண்டு, இப்போது விநியோகப் பயணங்கள் மிகவும் திட்டமிடப்பட்ட முறையிலும், கட்டுப்படுத்தப்பட்ட அளவிலும் மட்டுமே மேற்கொள்ளப்படுகின்றன.
இது குறித்து 64 வயதான லாரி ஓட்டுநர் பர்பீர் சிங் கூறுகையில், "சந்தையில் சரக்கு விநியோகத்திற்கான தேவை இன்னும் இருப்பதால் பணிகள் நடைபெறுகின்றன. ஆனால், நிறுவனங்கள் இப்போது தேவையற்ற பயணங்களைத் தவிர்த்து, மிகவும் அவசியமான விநியோகங்களுக்கு மட்டுமே முன்னுரிமை அளிக்கின்றன.
நேரத்தையும் டீசலையும் மிச்சப்படுத்த, ஒரே பகுதியில் உள்ள இடங்களுக்குச் செல்லும் சரக்குகள் ஒருங்கிணைக்கப்பட்டு ஒரே பயணமாகத் திட்டமிடப்படுகின்றன," என்றார். மேலும், சில எரிபொருள் நிலையங்களில் டீசல் இருப்பு தீர்ந்து போவது மற்றும் நீண்ட வரிசையில் காத்திருக்க வேண்டிய சூழல் தங்களின் பணி நேரத்தை விரயமாக்குவதாகவும் அவர் வருத்தம் தெரிவித்தார்.
மற்றொரு ஓட்டுநரான 34 வயது முஹம்மது பிர்தௌஸ் பேசுகையில், டீசல் நிரப்புவதில் விதிக்கப்பட்டுள்ள கட்டுப்பாடுகள் தங்களைப் பெரிதும் பாதிப்பதாகக் குறிப்பிட்டார்.
"முன்பு போல் இப்போது டேங்க் முழுமையாகத் டீசல் நிரப்ப முடிவதில்லை. இதனால் அடிக்கடி எரிபொருள் நிலையங்களுக்குச் செல்ல வேண்டியுள்ளது. இது பயண நேரத்தை வீணடிப்பதோடு, ஒரு நாளில் நாங்கள் மேற்கொள்ளும் பயணங்களின் (Trips) எண்ணிக்கையையும் குறைக்கிறது," என்றார்.
இதேவேளை, சில நிறுவனங்கள் தங்களின் ஓட்டுநர்களுக்கு உள்நாட்டு மானியங்களை வழங்கி வருவதாக 42 வயது முஹம்மது சல்லே தெரிவித்தார். நிறுவனங்களே டீசல் செலவை ஏற்பதால் சிலருக்குப் பாதிப்பில்லை என்றாலும், பல நிறுவனங்கள் பயணங்களைக் குறைத்துள்ளதால் ஓட்டுநர்களின் கூடுதல் வருமானம் பாதிக்கப்பட்டுள்ளதாக அவர் சுட்டிக்காட்டினார்.
தற்போதைய நிலவரப்படி, தீபகற்ப மலேசியாவில் மானியம் இல்லாத டீசல் விலை லிட்டருக்கு 70 காசுகள் உயர்ந்து 6.72 ரிங்கிட்டாக உள்ளது. இருப்பினும், சபா, சரவாக் மற்றும் லபுவானில் மானிய விலை 2.15 ரிங்கிட்டாகவே நீடிக்கிறது. அதேபோல், பொதுப் போக்குவரத்து மற்றும் சில குறிப்பிட்ட துறைகளுக்கான (SKDS & SKPS) டீசல் விலை முறையே 2.05 மற்றும் 2.15 ரிங்கிட்டாகத் தக்கவைக்கப்பட்டுள்ளது.
மக்களின் சுமையைக் குறைக்க அரசாங்கம் 'பூடி டீசல்' (BUDI Diesel) திட்டத்தின் கீழ் ஏப்ரல் மாதத்திற்கு கூடுதலாக 100 ரிங்கிட் நிதியுதவியை அறிவித்துள்ளது. இதன் மூலம் தகுதியுள்ள தனிநபர்கள் மற்றும் சிறு விவசாயிகள் மொத்தம் 300 ரிங்கிட் நிதியுதவியைப் பெறுவார்கள்.
மேலும், 'பூடி மடாணி' திட்டத்தின் கீழ் RON95 பெட்ரோல் விலை லிட்டருக்கு 1.99 ரிங்கிட்டாகத் தொடரும் வேளையில், மானியம் இல்லாத அதன் விலை 4.27 ரிங்கிட்டாக உயர்ந்துள்ளது என்பது குறிப்பிடத்தக்கது.
