ஷா ஆலம், மார்ச் 10 — கோல சிலாங்கூரில் உள்ள ஜாலான் ஸ்டேடியம் உணவு வளாகம் அருகே வணிகர்களுக்காக ஏற்பாடு செய்யப்பட்டுள்ள குப்பைத் தொட்டிகளைப் பலர் தவறாகப் பயன்படுத்துவதைக் கோல சிலாங்கூர் நகராண்மை கழகம் (எம்பிகேஎஸ்) கண்டறிந்துள்ளது. இதனால் அந்தப் பகுதி அசுத்தமாகவும் மோசமான நிலையில் காணப்படுவதாகத் தெரிவிக்கப்பட்டுள்ளது.
குறிப்பிட்ட இடத்தில் உள்ள வணிகர்கள் தங்களது வளாகங்களில் இருந்து வரும் கழிவுகளை நிர்வகிப்பதற்காக இந்தக் குப்பைத் தொட்டிகள் பிரத்யேகமாக வழங்கப்பட்டதாகக் கோல சிலாங்கூர் நகராண்மை கழகத்தின் கார்ப்பரேட் பிரிவு தெரிவித்துள்ளது.
இந்தத் தொட்டிகளின் இருப்பிடமும் சரியான முறையில் தேர்ந்தெடுக்கப்பட்டு, அந்தப் பகுதியில் உள்ள செயல்பாட்டு தேவைகளுக்கும் கழிவு மேலாண்மைக்கும் ஏற்றவாறு பொருத்தமாக அமைக்கப்பட்டுள்ளதாகவும் தெரிவிக்கப்பட்டது.
“எல்லா நேரங்களிலும் தூய்மை பராமரிக்கப்படுவதை உறுதி செய்வதற்காக, அந்த இடத்தில் குப்பை சேகரிப்பு நடவடிக்கை வாரத்திற்கு ஏழு முறை KDEB கழிவு மேலாண்மை (KDEBWM) மூலம் மேற்கொள்ளப்படுகிறது.
“கூடுதலாக, குப்பைகள் குவிவதையும் சுற்றுச்சூழல் மாசுபாட்டையும் தடுக்க, குப்பைத் தொட்டிகள் வைக்கப்பட்டுள்ள பகுதியிலிருந்து ஐந்து மீட்டர் சுற்றளவில் சுத்தம் செய்ய KDEBWM-க்கு எம்பிகேஎஸ் அறிவுறுத்தியுள்ளது,” என்று ஹரியான் மெட்ரோ செய்தி வெளியிட்டுள்ளது.
முன்னதாக, பொறுப்பற்ற தரப்பினர் இப்பகுதியில் உள்ள குப்பைத் தொட்டிகளை வீட்டு குப்பைகளைக் கொட்டும் இடமாகப் பயன்படுத்துவதாகவும், இதனால் பொதுமக்களிடையே அசௌகரியம் ஏற்படுவதாகவும் செய்திகள் வெளியாகியிருந்தன.
இந்தப் பிரச்சனை இரண்டு முதல் மூன்று ஆண்டுகளாக நீடித்து வருவதாகவும் தெரிவிக்கப்பட்டது.
ரமலான் மாதத்தை முன்னிட்டு, வர்த்தகர்களுக்கு நினைவூட்டும் வகையில் “தயவுசெய்து குப்பைகளைக் குப்பைத் தொட்டிக்குள் கொட்டுங்கள்” என்ற அறிவிப்புப் பலகைகளையும் நிறுவியுள்ளதாகக் கோல சிலாங்கூர் நகராண்மை கழகத்தின் கார்ப்பரேட் பிரிவு தெரிவித்துள்ளது.
எனவே, இந்த வசதிகள் தவறாகப் பயன்படுத்தப்படாமல் இருப்பதை உறுதிசெய்ய கண்காணிப்பு மற்றும் அமலாக்க நடவடிக்கைகளை எம்பிகேஎஸ் தீவிரப்படுத்தும் என்று கூறப்பட்டுள்ளது.
“குடியிருப்பு பகுதிகளில் திடக் கழிவு சேகரிப்பு வாரத்திற்கு மூன்று முறை, குறிப்பிட்ட அட்டவணையின்படி மேற்கொள்ளப்படுகிறது.
“பொது தூய்மை மற்றும் வசதிகள் சிறந்த மட்டத்தில் பராமரிக்கப்படுவதை உறுதி செய்வதில் எம்பிகேஎஸ் உறுதியாக உள்ளது. மேலும், அதன் சேவைகளை மேம்படுத்த சமூகத்திலிருந்து வரும் புகார்கள் மற்றும் கருத்துகள் வரவேற்கப்படுகின்றன,” என்று தெரிவிக்கப்பட்டது.
