கோலாலம்பூர், மார்ச் 3 (பெர்னாமா) – மலேசியாவின் விநியோக வர்த்தகத் துறையில் வெளிநாட்டுப் பங்களிப்புக்கான வழிகாட்டுதல்களை மேம்படுத்தும் முயற்சிகள், சம்பந்தப்பட்ட தரப்பினரின் கருத்துக்களையும் தற்போதைய சிறந்த நடைமுறைகளையும் கருத்தில் கொள்ளும்.
பயன்படுத்தப்படும் கொள்கைகள் பொருத்தமானதாகவும், போட்டித்தன்மை கொண்டதாகவும், உயர் தாக்கத்தை ஏற்படுத்துவதாகவும் இருப்பதை உறுதி செய்வதற்கும், உள்ளூர் குறு, சிறு மற்றும் நடுத்தர நிறுவனங்களின் (PMKS) வணிக நிலைத்தன்மையைக் கருத்தில் கொள்வதற்கும் இந்த நடவடிக்கை முக்கியம் என்று உள்நாட்டு வர்த்தகம் மற்றும் வாழ்க்கைச் செலவின அமைச்சர் டத்தோ அர்மிசான் முகமட் அலி கூறினார்.
இது சம்பந்தமாக, இது தொடர்பான மேம்பாட்டு நடவடிக்கைகளை விரிவாக ஆராய, நிதி அமைச்சகத்தின் தலைமையில் ஒரு சிறப்புப் பணிக்குழுவை அமைக்க கடந்த பிப்ரவரி 6-ஆம் தேதி அமைச்சரவை ஒப்புக்கொண்டதாக அவர் கூறினார்."உள்ளூர் சந்தையில் வெளிநாட்டுப் பொருட்கள் குவிக்கப்படும் அபாயங்கள் குறித்த கவலைகளை நிவர்த்தி செய்வதில் கொள்கை, சட்டக் கட்டமைப்பு, கண்காணிப்பு மற்றும் அமலாக்க மேம்பாடுகளைக் கண்டறிவதே இந்தக் குழுவின் செயல்பாடாகும்" என்று அவர் இன்று மக்களவையில் தனது அமைச்சகத்திற்கான அரசப் பேருரைக்கு நன்றி தெரிவிக்கும் தீர்மானத்தின் மீதான விவாதத்தை நிறைவு செய்து பேசுகையில் கூறினார்.
தனது அமைச்சகத்திற்கான விவாதத்தை நிறைவு செய்த பொதுப்பணித்துறை துணை அமைச்சர் டத்தோஸ்ரீ அஹ்மத் மஸ்லான், கிழக்குக் கடற்கரை விரைவுச்சாலை மூன்றாம் கட்ட (LPT3) திட்டத்திற்கான முன்மொழிவு கோரிக்கை (RFP) ஆவணங்கள் இந்த ஆண்டு இறுதி செய்யப்படும் என்றும், அதன் மூலம் இத்திட்டத்தை பொது-தனியார் கூட்டாண்மை (PPP) மூலம் செயல்படுத்த முடியும் என்றும் கூறினார்.
"LPT3 திட்டம், அரசாங்கத்திடமிருந்து நிதி ஒதுக்கீடு இன்றி, போட்டித்தன்மை வாய்ந்த RFP ஏலத்தின் மூலம் தனியார்மயமாக்கப்பட்டு செயல்படுத்தப்படும்," என்று அவர் கூறினார்.
தொடக்கக்கட்ட ஆய்வின் அடிப்படையில், LPT3-இன் பாதை திரங்கானு, கம்போங் கெமுரோ-விலிருந்து தொடங்கி கிளந்தான், துஞ்சோங்கில் முடிவடைகிறது. இது 122 கிலோமீட்டர் தூரத்தை உள்ளடக்கியது. இது கிழக்குக் கடற்கரையில் வசதியான பயணத்தை வழங்க LPT1 மற்றும் LPT2 விரைவுச்சாலை வலையமைப்பை நிறைவு செய்யும்.
இதற்கிடையில், சுகாதார அமைச்சகத்திற்கான விவாதத்தை நிறைவு செய்த சுகாதாரத் துணை அமைச்சர் டத்தோ ஹனிஃபா ஹஜார் தைப்பிடம், நாடு முழுவதும் உள்ள 412 சுகாதார கிளினிக்குகள் தற்போது நோயாளிகளின் டிஜிட்டல் மருத்துவப் பதிவுகளை நிர்வகிப்பதை வலுப்படுத்த கிளவுட் கம்ப்யூட்டிங் முறையிலான மருத்துவ மேலாண்மை அமைப்புடன் (CCMS) பொருத்தப்பட்டுள்ளன என்று கூறினார்.இந்த ஆண்டு, மேலும் 137 சுகாதார கிளினிக்குகளை டிஜிட்டல் மயமாக்குவதில் அமைச்சு உறுதியாக உள்ளது என்றும், மீதமுள்ள 848 கிளினிக்குகளை 2027-ஆம் ஆண்டுக்குள் முழுமையாக முடிப்பதற்கு இலக்கு நிர்ணயிக்கப்பட்டுள்ளது என்றும் அவர் குறிப்பிட்டார்.
இதன் மூலம் செயல்பாட்டுத் திறனை அதிகரிப்பது, தரவு நிர்வாகத்தை வலுப்படுத்துவது மற்றும் முதன்மை சுகாதார வசதிகளில் கைமுறைப் பதிவுகளைச் சார்ந்திருப்பதைக் குறைப்பது ஆகியவையே இதன் நோக்கமாகும்.2024-ஆம் ஆண்டில் தொடங்கப்பட்ட இந்த அமைப்பு, டிஜிட்டல் மருத்துவப் பதிவு (EMR) முயற்சியின் கீழ் ஒரு விரிவான ஒருங்கிணைப்புத் திட்டத்தின் ஒரு பகுதியாகும்.மற்றொரு நிலவரத்தில், 2030-க்குள் வெளிநாட்டுத் தொழிலாளர்களின் எண்ணிக்கையை 10 சதவீதமாகவும், 2035-க்குள் ஐந்து சதவீதமாகவும் கட்டுப்படுத்தும் பதின்மூன்றாவது மலேசியத் திட்டத்தின் இலக்கிற்கு ஏற்ப, வெளிநாட்டுத் தொழிலாளர் விண்ணப்ப செயல்முறையை முழுமையாக டிஜிட்டல் மயமாக்குவதற்கான முன்மொழிவை மனிதவள அமைச்சு ஆராய்ந்து வருகிறது.
தொழில்துறையின் தேவைகளுக்கும் உள்ளூர் தொழிலாளர்களின் இறையாண்மைக்கும் இடையில் சமநிலையை உறுதிசெய்ய, சம்பந்தப்பட்ட தரப்பினருடன் அமைச்சு தொடர்ந்து ஈடுபாட்டுக் கூட்டங்களை நடத்தும் என்று மனிதவளத் துணை அமைச்சர் கைருல் ஃபிர்தௌஸ் அக்பர் கான் கூறினார்.இன்றைய விவாதத்தை தற்காப்பு அமைச்சும் நிறைவு செய்தது.நாடாளுமன்றக் கூட்டம் நாளை தொடரும்.-- பெர்னாமா
