சிலாங்கூர் மிகப்பெரிய சோலார் பண்ணையை உருவாக்குகிறது, 1 பில்லியன் ரிங்கிட் மதிப்புள்ள பிவி பெஸ்தாரி திட்டம்
கோல சிலாங்கூர், பிப் 10: புதுப்பிக்கத்தக்க எரிசக்தி திட்டத்தை வலுப்படுத்தும் ஒரு நடவடிக்கையாக, மாநிலத்தின் மிகப்பெரிய சோலார் பண்ணையாக அமையவிருக்கும் சோலார் போட்டோவோல்டாயிக் (PV) பெஸ்தாரி திட்டத்தின் கட்டுமானப் பணிகளை சிலாங்கூர் தொடங்கியுள்ளது.
ஐந்தாவது பெரிய அளவிலான சோலார் திட்டத்தின் (LSS5) கீழ் செயல்படுத்தப்படும் இத்திட்டம், 430 ஹெக்டேருக்கும் அதிகமான பரப்பளவைக் கொண்டுள்ளதுடன், 300 மெகாவாட் (MWac) உற்பத்தித் திறனையும் கொண்டிருக்கும்.
தீபகற்ப மலேசியாவின் பாதி எரிசக்தி உற்பத்தியும் பயன்பாடும் கிள்ளான் பள்ளத்தாக்கில் குவிந்துள்ளது, குறிப்பாக தொழில், குடியிருப்பு மற்றும் மின்சார வாகன (EV) சந்தையை ஆதரிப்பதற்காக இருப்பதால் இந்தத் திட்டம் மிகவும் முக்கியமானது என்று சிலாங்கூர் மந்திரி புசார், டத்தோ ஸ்ரீ அமிருடின் ஷாரி கூறினார்.
இத்திட்டம், தேசிய எரிசக்தி மாற்றத்திற்கான பெருந்திட்டத்திற்கு (NETR) இணங்க உள்ளதுடன், கடந்த அக்டோபரில் தொடங்கப்பட்ட சிலாங்கூர் பசுமைப் பொருளாதார நிகழ்ச்சி நிரலையும் ஆதரிக்கிறது என்று அவர் கூறினார்.
"7.3 மில்லியன் மக்கள்தொகையைக் கொண்ட சிலாங்கூர், நாட்டின் பொருளாதாரத்திற்கு 26.2 விழுக்காடு பங்களிப்பு செய்வதால், எரிசக்தி விவகாரங்கள் உட்பட பெரிய பொறுப்புகளை மாநிலம் கொண்டுள்ளது," என்று அவர் இன்று இங்கு திட்டத்தின் அடிக்கல் நாட்டு விழாவில் கூறினார்.
460 மெகாவாட்-பீக் (MWp) நிறுவப்பட்ட திறன் கொண்ட இந்த வசதி, ஆண்டுக்கு சராசரியாக 640,000 மெகாவாட்-மணிநேரம் (MWh) சுத்தமான மின்சாரத்தை உருவாக்கும் என்று எதிர்பார்க்கப்படுகிறது.
1 பில்லியன் ரிங்கிட் மதிப்புள்ள இத்திட்டத்திற்கான எரிசக்தி கொள்முதல் ஒப்பந்தம் (PPA) மார்ச் 2025-இல் கையெழுத்தானது. இதன் செயல்பாடுகள் ஜூலை 2027-இல் தொடங்கி 21 ஆண்டுகள் நீடிக்கும்.
இத்திட்டம், குரூப்புலான் ஹர்த்தானா சிலாங்கூர் பெர்ஹாட் (KHSB) மற்றும் சிலாங்கூர் விவசாய மேம்பாட்டுக் கழகத்திற்கு (PKPS) சொந்தமான நிலத்தில், எட்ரா பவர் ஹோல்டிங்ஸ் சென்டிரியான் பெர்ஹாட், வேர்ல்ட்வைட் ஹோல்டிங்ஸ் பெர்ஹாட் மற்றும் ரொட்டகா இன்ஜினியரிங் சர்வீசஸ் (எம்) சென்டிரியான் பெர்ஹாட் தலைமையிலான பெஸ்தாரி சோலார் சென்டிரியான் பெர்ஹாட் (BSSB) கூட்டமைப்பால் உருவாக்கப்படுகிறது.
தரை மற்றும் மிதக்கும் சோலார் மேம்பாட்டிற்கு சிலாங்கூரில் பெரும் ஆற்றல் உள்ளது. மேலும், மாநிலத்தின் புதுப்பிக்கத்தக்க எரிசக்தி கலவையை நிறைவு செய்யக்கூடிய நீர்மின் உற்பத்தி வாய்ப்புகளும் உள்ளன என்று அமிருடின் கூறினார்.
கடந்தாண்டின் முதல் ஒன்பது மாதங்களில் 43,998 புதிய வேலை வாய்ப்புகளை உருவாக்கி, நாட்டில் அதிக புதிய வேலை வாய்ப்புகளை உருவாக்கும் மாநிலம் என்ற சிலாங்கூரின் சாதனைக்கும் இத்திட்டம் துணைபுரியும் என்று அவர் மேலும் கூறினார்.
இந்தாண்டின் இறுதியில் தொடங்கப்படவுள்ள இரண்டாவது சிலாங்கூர் திட்டத்தின் (RS-2) மூலம், மாநில வளர்ச்சியில் நிலைத்தன்மை கூறுகள் தொடர்ந்து பயன்படுத்தப்படும் என்று அவர் கூறினார்.
