கோலாலம்பூர், ஜன 19- ரேபிட் ஆன்-டிமாண்ட் வேன் சேவைக்கான ஒரு ரிங்கிட் (RM1) அறிமுகக் காலச் சலுகை முடிவுக்கு வருகிறது. வரும் பிப்ரவரி 1-ஆம் தேதி முதல், இதற்கான நிலையான கட்டணமாக 2 ரிங்கிட் (RM2) வசூலிக்கப்படும் என்று பிரசரானா மலேசியா அறிவித்துள்ளது.
இந்த மாற்றமானது My50, ரேபிட் கோட்டா (Rapid Kota), ரேபிட் கெம்பாரா (Rapid Kembara) மற்றும் ரேபிட் கெலுவார்கா (Rapid Keluarga) ஆகிய பயண அட்டைகளை வைத்திருப்போருக்கும் பொருந்தும்.
தற்போது இந்தச் சேவை கிள்ளான் பள்ளத்தாக்கில் 71 மண்டலங்களிலும், பினாங்கில் 11 மண்டலங்களிலும் என மொத்தம் 82 மண்டலங்களில் செயல்பட்டு வருகிறது.
எதிர்காலத்தில் இந்தச் சேவையை மேலும் விரிவுபடுத்த பிரசரானா திட்டமிட்டுள்ளது. குறிப்பாக, 2027 மற்றும் 2028-ஆம் ஆண்டுகளுக்கு இடையில் சுமார் 300 மின்சார வேன்களை (Electric Vans) அறிமுகப்படுத்தத் திட்டமிடப்பட்டுள்ளது.
இதில் 130 வேன்கள் கிள்ளான் பள்ளத்தாக்கிற்கும், 170 வேன்கள் பினாங்கிற்கும் ஒதுக்கப்படவுள்ளன. இதன் மூலம் கிள்ளான் பள்ளத்தாக்கில் 22 புதிய மண்டலங்களும், பினாங்கில் 23 புதிய மண்டலங்களும் சேர்க்கப்படும்.
மேலும், மாற்றுத்திறனாளிகளுக்கான வசதிகளையும் மேம்படுத்தப் போவதாகப் பிரசரானா தெரிவித்துள்ளது
