கோலாலம்பூர், ஜன 15- மலேசியாவில் தைப்பொங்கல் திருநாள் இயற்கையன்னை, சூரியன் மற்றும் விவசாயிகளுக்கு நன்றி தெரிவிக்கும் ஒரு வண்ணமயமான விழாவாகக் கொண்டாடப்படுகிறது.
அறுவடைச் செழிப்பைக் கொண்டாடும் இவ்விழா, தமிழ் காலண்டரின் படி தை மாதத்தின் தொடக்கத்தைக் குறிக்கிறது. இது விவசாய சுழற்சியின் ஆரம்பம் மட்டுமன்றி, புதிய நம்பிக்கைகள் மற்றும் நல்வாய்ப்புகளின் அடையாளமாகவும் திகழ்கிறது என்று சட்டம் மற்றும் கழக சீர்த்திருத்த பிரதமர் துறை துணையமைச்சர் மாண்புமிகு எம்.குலசேகரன் கூறினார்.
பொங்கல் பானையில் பால் பொங்கி வழிவது, நாட்டின் ஒவ்வொரு இல்லத்திலும் செழிப்பும் மகிழ்ச்சியும் பொங்கி வழிய வேண்டும் என்பதைக் குறிக்கிறது.
இந்தத் திருவிழாக் காலம் குடும்ப உறவுகளை வலுப்படுத்தவும், சமூகத்தில் அன்பைப் பரிமாறிக் கொள்ளவும் ஒரு சிறந்த வாய்ப்பாக அமைகிறது. ஒரு நல்ல அறுவடைக்கு எப்படிக் கடின உழைப்பும் பொறுமையும் தேவையோ, அதேபோல் ஒரு இணக்கமான தேசத்தைக் கட்டியெழுப்ப பரஸ்பர மரியாதையும் புரிதலும் அவசியமாகும்.
மலேசியா மடாணி எனும் தத்துவத்தின் அடிப்படையில், மக்கள் தங்களுக்கு இடையிலான வேறுபாடுகளைக் கடந்து, தங்களை இணைக்கும் பொதுவான விழுமியங்களில் கவனம் செலுத்துமாறு வலியுறுத்தப்படுகிறது.
இந்த ஒற்றுமையே நாடு அமைதியாகவும், வலிமையாகவும், செழிப்பாகவும் இருப்பதை உறுதி செய்யும். பொங்கல் திருநாளைக் கொண்டாடும் அனைத்து இந்தியர்களுக்கும், குறிப்பாகத் தமிழ் மக்களுக்கும் இனிய தைப்பொங்கல் நல்வாழ்த்துகள் தெரிவிக்கப்படுவதோடு, இந்த ஆண்டு அனைவருக்கும் புதிய ஒளியையும் வளத்தையும் கொண்டு வரட்டும் என எதிர்பார்க்கப்படுகிறது என்று எம்.குலசேகரன் பொங்கல் வாழ்த்தினைத் தெரிவித்து கொண்டார்.
