ஷா ஆலாம், அக் 31 : 16-ஆவது மலாக்கா மாநிலத் தேர்தலில் மொத்தம் 79 வேட்பாளர்கள் போட்டியிடவுள்ளதாக தேர்தல் ஆணையத் தலைவர் ரம்லான் ஹாரூன் அறிவித்துள்ளார்.
கடந்த 2021 மாநிலத் தேர்தலில் 28 இடங்களுக்காக தேசிய முன்னணி, பக்காத்தான் ஹரப்பான், மற்றும் பெரிகாத்தான் நேஷனல் ஆகிய கூட்டணிகள் தீவிரமாக மோதியதால் 112 வேட்பாளர்கள் களம் கண்டனர்.
அதனுடன் ஒப்பிடுகையில், இம்முறை தேர்தல் களம் சற்று குறைவாகவே நெரிசலாகக் காணப்படுகிறது.
இம்முறை கட்சிகள் வாரியாகப் பார்க்கும்போது, பக்காத்தான் ஹரப்பான் கூட்டணி அதிகபட்சமாக 24 வேட்பாளர்களையும், தேசிய முன்னணி 23 வேட்பாளர்களையும் களமிறக்கியுள்ளன.
இவற்றுக்கு அடுத்தபடியாக பெர்சாமா கட்சி 16 வேட்பாளர்களையும், பெர்சத்து கட்சி 7 வேட்பாளர்களையும், பெரிகாத்தான் நேஷனல் 5 வேட்பாளர்களையும், புத்ரா கட்சி ஒரு வேட்பாளரையும் நிறுத்தியுள்ளன.
இவர்களுடன் சேர்த்து மூன்று சுயேச்சை வேட்பாளர்களும் இந்தத் தேர்தலில் போட்டியிடுகின்றனர்.
வேட்பாளர்களின் பாலின அடிப்படையில் 65 ஆண்களும் 14 பெண்களும் இம்முறை களத்தில் இறங்கியுள்ளனர்.
இந்தத் தேர்தல் களம் 11 தொகுதிகளில் நேரடிப் போட்டியையும், மேலும் 11 தொகுதிகளில் மும்முனைப் போட்டியையும் காணவுள்ளது.
மீதமுள்ள காடெக், கெலிபாங், பெங்காலான் பத்து, ஆயர் குரோ, புக்கிட் காட்டில் மற்றும் பெம்பான் ஆகிய 6 தொகுதிகளில் நான்கு முனைப் போட்டிகள் நிலவுகின்றன.
இந்தத் தேர்தலில் போட்டியிடும் வேட்பாளர்களிலேயே மிக வயதானவராக தெலோக் மாஸ் தொகுதியில் போட்டியிடும் 66 வயது பக்காத்தான் ஹரப்பான் வேட்பாளர் முஹமட் ஜாபர் விளங்குகிறார்.
அதே வேளையில், கோலா லிங்கி தொகுதியில் பக்காத்தான் ஹரப்பான் சார்பில் போட்டியிடும் 24 வயது முக்லிசுல் முபீன் ஜுலாசபியா மிக இளம் வயது வேட்பாளராகக் களம் காண்கிறார்.
மலாக்கா மாநிலத்தில் மொத்தம் 687,697 வாக்காளர்கள் வாக்களிக்கத் தகுதி பெற்றுள்ளனர்.
வாக்களிப்பு தினம் நவம்பர் 14 -ஆம் தேதியாகும்.






