ரயில் மீது பொருள் வீச்சு: ஜன்னல் சேதத்திற்கு காரணம்

30 அக்டோபர் 2026, 1:56 PM
ரயில் மீது பொருள் வீச்சு:  ஜன்னல் சேதத்திற்கு காரணம்

ஷா ஆலாம், அக் 30: பாடாங் பெசார்-பட்டர்வொர்த் இடையிலான கேடிஎம் (KTM) ரயிலின் உடைந்த ஜன்னல் கண்ணாடிக்கு, பொறுப்பற்ற தரப்பின் செயலே காரணம் என கேடிஎம்பி (KTMB) நிறுவனம் உறுதிப்படுத்தியுள்ளது.

நேற்று மாலை 6 மணியளவில் ஆராவ் மற்றும் கோடியாங் பகுதிகளுக்கு இடையே 2951 எண் கொண்ட ரயில் பயணித்துக் கொண்டிருந்தபோது, வெளியிலிருந்து வீசப்பட்ட அடையாளம் தெரியாத ஒரு பொருள் தாக்கியதில், அதன் இரண்டாவது பெட்டியின் இடது பக்க ஜன்னல் கண்ணாடி சுக்குநூறாக உடைந்ததாக கேடிஎம்பி தெரிவித்தது.

"ரயில் ஓட்டுநரால் இந்த விவகாரம் குறித்து எச்சரிக்கப்பட்ட உடனேயே கேடிஎம்பி தகுந்த நடவடிக்கை எடுத்தது. பாதுகாப்பு நடவடிக்கையாகப் பாதிக்கப்பட்ட அந்த ரயில் பெட்டி உடனடியாகக் காலியாக்கப்பட்டு, பயணிகள் அங்குச் செல்வது தடுக்கப்பட்டது.

மேலும், பாதிக்கப்பட்ட பெட்டியின் உள்ளே நிலைமையைக் கட்டுக்குள் வைத்திருக்கவும், பயணிகளின் நடமாட்டத்தைக் கண்காணிக்கவும் கேடிஎம்பி-இன் துணைப் போலீஸ் படையினர் பணியில் ஈடுபடுத்தப்பட்டனர்," என்று அந்நிறுவனம் இன்று வெளியிட்ட ஓர் அறிக்கையில் கூறியது.

இந்தச் சம்பவத்தைத் தொடர்ந்து, அந்த ரயில் திட்டமிடப்பட்ட நேரத்தை விட 21 நிமிடங்கள் தாமதமாக, மாலை 6.21 மணிக்குத் தனது பயணத்தைத் தொடர்ந்தது.

பாதிக்கப்பட்ட அந்த ரயில் பின்னர் சேவையிலிருந்து தற்காலிகமாக நிறுத்தப்பட்டு, ஆய்வு மற்றும் ஜன்னல் கண்ணாடியை மாற்றுவதற்காக புக்கிட் தெங்கா பணிமனைக்குக் கொண்டு செல்லப்பட்டது.

அடுத்த நாள் அது மீண்டும் பயணிகள் சேவைக்குக் கொண்டு வரப்பட்டது.

இது குறித்து போலீசில் புகார் செய்துள்ளதாக கேடிஎம்பி தெரிவித்தது.

ரயில்வே சொத்துக்களுக்கு சேதத்தை ஏற்படுத்தும் இதுபோன்ற செயல்களைத் தாங்கள் தீவிரமாகக் கருதுவதாகவும், ஓடிக்கொண்டிருக்கும் ரயில்கள் மீது கற்களை வீசுவது பயணிகளின் மற்றும் ரயில் ஊழியர்களின் உயிருக்கு ஆபத்தை விளைவிக்கும் என்றும் அது எச்சரித்துள்ளது.

2010ஆம் ஆண்டு நிலப் பொதுப் போக்குவரத்துச் சட்டத்தின் (சட்டம் 715) பிரிவு 132-இன் கீழ், ரயில்கள் மீது கற்களை வீசுவது குற்றமாகும். இக்குற்றம் நிரூபிக்கப்பட்டால் 25,000 ரிங்கிட் வரை அபராதம், 10 ஆண்டுகள் வரை சிறைத்தண்டனை அல்லது இரண்டும் விதிக்கப்படலாம்.

அதே சட்டத்தின் பிரிவு 128, ரயில்வே சொத்துக்களுக்குச் சேதம் விளைவிக்கும் குற்றங்களை உள்ளடக்கியது.

குற்றத்தின் தன்மைக்கேற்ப இதற்கான தண்டனைகள் மாறுபடும்.

ரயில்வே இயக்கங்களுக்கு ஆபத்தை விளைவிக்கும் செயல்களில் ஈடுபடுவதைத் தவிர்க்குமாறு பொதுமக்களைக் கேட்டுக்கொண்ட KTMB, சந்தேகத்திற்கிடமான நடவடிக்கைகளைக் கண்டால் உடனடியாக அதிகாரிகளுக்குத் தெரிவிக்குமாறு வலியுறுத்தியுள்ளது.

வகைnational

உங்கள் கருத்து என்ன?

அண்மைய செய்திகள்
Media Selangor
எங்களைப் பற்றி

Media Selangor Sdn Bhd என்பது சிலாங்கூர் மந்திரி பெசார் கழகத்தின் (MBI) துணை நிறுவனம் ஆகும். இது மாநில அரசின் ஊடக ஏஜென்ஸியாக செயல்படுகிறது. Selangorkini மற்றும் SelangorTV ஆகியவற்றுடன் கூட, இந்த நிறுவனம் சீனம், தமிழும் மற்றும் ஆங்கிலத்திலும் இணையதளங்கள் மற்றும் பத்திரிகைகளை வெளியிடுகிறது.