வாஷிங்டன், ஆகஸ்ட் 2 — அமெரிக்காவும் இஸ்ரேலும் இணைந்து ஈரானுக்கு எதிரான புதிய தாக்குதல்களைத் தற்காலிகமாக ஒத்திவைக்க ஒப்புக்கொண்டுள்ளதாக அமெரிக்க அதிபர் டொனால்ட் டிரம்ப் அறிவித்துள்ளார்.
கடந்த சில மாதங்களாகத் தொடர்ந்துவரும் இந்த மோதலுக்கு முற்றுப்புள்ளி வைக்கும் வகையிலான பேச்சுவார்த்தைகளுக்கு வழி அமைக்கும் விதமாக இந்த முக்கிய முடிவு எடுக்கப்பட்டுள்ளது.
ஈரான் மீது மிகப்பெரிய அளவிலான தாக்குதலை நடத்தக்கூடும் என்றும், குறிப்பாக அந்நாட்டின் எரிசக்தி கட்டமைப்புகளைத் தாக்குவதற்கு வாய்ப்புள்ளதாகவும் அதிபர் டிரம்ப் விடுத்த எச்சரிக்கைகள் சர்வதேச அளவில் பெரும் அச்சத்தை ஏற்படுத்தியிருந்தன. இத்தகைய சூழலில்தான் இந்த அதிரடி அறிவிப்பு வெளியாகியுள்ளது.
ஈரானுக்கு எதிராகத் கடுமையான நடவடிக்கை எடுப்பதற்கு அமெரிக்கா முழுமையான தயார் நிலையில் இருந்தபோதிலும், தெஹ்ரான் அரசாங்கமும் மத்திய கிழக்கு நாடுகளும் விடுத்த வேண்டுகோள்களை ஏற்றுத் தாக்குதல் தற்காலிகமாக ஒத்திவைக்கப்பட்டுள்ளதாக டிரம்ப் தெரிவித்தார்.
அமெரிக்கா மற்றும் இஸ்ரேல் முன்வைத்துள்ள நிபந்தனைகளின்படி, ஹோர்மூஸ் நீரிணை உடனடியாகத் திறக்கப்பட வேண்டும் என்றும், ஈரானின் அணுஆயுத அச்சுறுத்தல்கள் முழுமையாக நிறுத்தப்பட வேண்டும் என்றும் அவர் தெளிவுபடுத்தினார்.
அமெரிக்கா, இஸ்ரேல் மற்றும் ஈரான் நாடுகளுக்கு இடையேயான இந்த மோதல் கடந்த பிப்ரவரி 28-ஆம் தேதி தெஹ்ரான் மீது நடத்தப்பட்ட தாக்குதல்களுடன் தொடங்கியது. அதனைத் தொடர்ந்து இரு தரப்பினரும் தொடர்ச்சியான ஏவுகணை மற்றும் வான்வழித் தாக்குதல்களில் ஈடுபட்டு வருவது குறிப்பிடத்தக்கது.
