கோலா லங்காட், ஜூலை 26 — சிலாங்கூர் மாநிலம் நாட்டின் மிகப்பெரிய முலாம்பழம் (Melon) உற்பத்தியாளராக உருவெடுக்கத் திட்டமிட்டுள்ளது.
அதிக மதிப்புள்ள அப்பழத்தின் பயிரிடும் பரப்பளவை விரிவாக்கி, நவீன தொழில்நுட்பத்தைப் பயன்படுத்தி அப்பழ உற்பத்தியை அதிகரிக்கவுள்ளது.
அதற்கு அம்மாநிலத்தின் முலாம்பழத் தொழில்துறையை வலுப்படுத்தும் வகையில் புதிதாக 'சிலாங்கூர் முலாம்பழம் தொழில்நுட்ப மையம்' (Selangor Melon Technology Centre) திறக்கப்பட்டுள்ளது.
அம்மையம் அப்பழ உற்பத்தியின் ஆராய்ச்சி - மேம்பாட்டு (R&D) மையமாகச் செயல்படுமென உள்கட்டமைப்பு - விவசாயத் துறைக்கான மாநில ஆட்சிக் குழு உறுப்பினர் (Exco) டத்தோ இஷாம் ஹாஷிம் தெரிவித்தார்.
"கடந்த சில ஆண்டுகளாக முலாம்பழம் எங்களின் முக்கிய முன்னுரிமைகளில் ஒன்றாக இருந்து வருகிறது. அதனால்தான் முலாம்பழ விதை ஆராய்ச்சியில் முதலீடு செய்தோம், ஏனெனில் இது அதிக பொருளாதார மதிப்புள்ள தினசரி உணவாக மாறுவதற்கான திறனைக் கொண்டுள்ளது.
ஒரு விதை ஆராய்ச்சி நிறுவனத்துடன் இணைந்து, இந்த விதை ஆராய்ச்சிக்கு சுமார் இரண்டு ஆண்டுகள் ஆனது.
அதன் பிறகே இன்று நம்மிடம் உள்ள விதைகளை நாங்கள் வெற்றிகரமாக உருவாக்கினோம்," என்று இஷாம் கூறினார்.
நேற்று சிலாங்கூர் முலாம்பழ தொழில்நுட்ப மையத்தை அதிகாரப்பூர்வமாகத் திறந்து வைத்த பின்னர், அவர் மீடியா சிலாங்கூர் செய்தி நிறுவனத்திடம் பேசினார்.
சிலாங்கூரில் தற்போது 'மெலோசெல்' (Melosel) மற்றும் 'மாஸ்மெலன்' (Masmelon) ஆகிய இரண்டு முலாம்பழ வகைகள் உள்ளன.
இவற்றிற்கு எவ்வளவு அதிக தேவை உள்ளது என்றால், தற்போதைய உற்பத்தித் திறனை விட ஆர்டர்கள் அதிகமாக உள்ளன, குறிப்பாக கிள்ளான் பள்ளத்தாக்கில் இதன் தேவை மிக அதிகம்.எனவே, வளர்ந்து வரும் சந்தை தேவையைப் பூர்த்தி செய்யும் அதே வேளையில், சிலாங்கூரின் விவசாயச் சூழலுக்கு ஏற்ற கூடுதல் முலாம்பழ வகைகளை உருவாக்க மாநில அரசு ஆராய்ச்சியில் தொடர்ந்து முதலீடு செய்யும்." என இஷாம் கூறினார்.
சிலாங்கூரில் நிலத்தின் விலை அதிகமாக இருந்தபோதிலும், மழைப் புகலிடங்கள் (rain shelters), சொட்டுநீர் உரப்பாசன முறைகள் (fertigation systems) மற்றும் நவீன விவசாய முறைகள் போன்ற தொழில்நுட்பங்கள், முலாம்பழ விளைச்சலை அதிகரிக்க உதவுகின்றன.
"சிலாங்கூர் ஒரு வளர்ந்த மாநிலம், இங்கு நிலத்தின் விலை அதிகம் மற்றும் செயல்பாட்டுச் செலவுகளும் அதிகம். விவசாயத்தை முறையாகவும் திறம்படவும் நிர்வகிக்கவில்லை என்றால், அது கிடைக்க வேண்டிய லாபத்தைத் தராது" என்று இஷாம் கூறினார்.
மாநில அரசு சமூகத் தோட்டங்களை (community gardens) இதில் ஈடுபடுத்துவதன் மூலம் பயிரிடும் பரப்பளவை விரிவாக்கும் அதே வேளையில், சொட்டுநீர் உரப்பாசனம் மற்றும் மழைப் புகலிடங்கள் போன்ற தொழில்நுட்பங்களின் பயன்பாட்டையும் வலுப்படுத்தும்.
"நாங்கள் சமூகத் தோட்டங்களை மேலும் மேம்படுத்துவோம். ஊராட்சி அமைப்புகளின் கீழ் நூற்றுக்கணக்கான சமூகத் தோட்டங்கள் உள்ளன. அவற்றுக்கு மழைப் புகலிடங்கள் மற்றும் தொழில்நுட்ப வடிவிலான உதவிகளை வழங்கத் தொடங்குவோம்.
ஏனெனில் அவர்களும் சந்தைக்காக முலாம்பழங்களை பயிரிடப் போகிறார்கள்," என்று அவர் கூறினார்.
