ஷா ஆலாம், ஜூலை 2: இந்த வாரத் தொடக்கத்தில் பயனாளர்களைப் பெரிதும் பாதித்திருந்த 'ஃபிளெக்ஸி பார்க்கிங்' (Flexi Parking) மற்றும் 'ஸ்மார்ட் சிலாங்கூர்' (Smart Selangor) ஆகிய வாகன நிறுத்தக் கட்டணச் செயலிகளின் சேவைகள் தற்போது முழுமையாகச் சீரமைக்கப்பட்டுள்ளன.
இவ்விரு செயலிகளின் நிறுவனங்களும் இன்று தனித்தனியே வெளியிட்ட அறிக்கைகளில், தங்களின் தளங்கள் இயல்பு நிலைக்குத் திரும்பியுள்ளதை உறுதிப்படுத்தியுள்ளன.
பொதுமக்கள் இப்போது தங்களின் வாகன நிறுத்தக் கட்டணங்களைச் செலுத்தத் தொடங்கலாம்.
மலேசியா முழுவதும் உள்ள 64 உள்ளூராட்சி அமைப்புகளின் கீழ் இயங்கும் வாகன நிறுத்தக் கட்டணச் சேவைகளைப் பாதித்த ஒரு திட்டமிடப்பட்ட சைபர் தாக்குதலுடன் (Cyberattack) இந்தச் சேவை முடக்கம் தொடர்புடையது என்பது குறிப்பிடத்தக்கது.
