பள்ளி விடுமுறையை முன்னிட்டு குடும்பங்களின் ஈர்ப்பு மையமாக மாறியது ஷா ஆலாம்

ஷா ஆலம், ஜூன் 5 - பள்ளி விடுமுறையின் போது பெற்றோர்கள் தங்கள் குழந்தைகளுடன் பல்வேறு பொழுதுபோக்கு நடவடிக்கைகளில் ஈடுபடுவதால், ஷா ஆலமில் உள்ள பல பொழுதுபோக்கு மையங்கள் குடும்பங்களின் முக்கிய ஈர்ப்பாகத் தொடர்ந்து திகழ்கின்றன.

நகரில் உள்ள ஒரு நீர் விளையாட்டுப் பூங்காவில் (water theme park) 'மீடியா சிலாங்கூர்' நடத்திய ஆய்வில், குடும்பங்களுக்கு ஏற்ற வசதிகள், கட்டுப்படியான விலை மற்றும் எளிதாகச் சென்றடையும் வசதி ஆகியவற்றைக் கொண்ட பொழுதுபோக்கு இடங்களை வார இறுதி விடுமுறைக்கான இடங்களாகப் பல பார்வையாளர்கள் தேர்ந்தெடுப்பது தெரியவந்துள்ளது.

வீட்டிலிருந்து குறுகிய தூரத்தில் இருப்பதாலும், குடும்பத்துடன் நிம்மதியாகப் பொழுதைக் கழிக்க ஏற்றதாக இருப்பதாலும் இந்த இடத்தைத் தேர்ந்தெடுத்ததாக 44 வயதுடைய முகமது ரிடுவான் அப்துல் ஹமீட் கூறினார்.

"நான் இங்கு வருவது இது மூன்றாவது முறை. வசதிகளைப் பொறுத்தவரை, எனக்குத் திருப்தியாக உள்ளது. குறிப்பாக B40 தரப்பினருக்கு டிக்கெட் விலையும் கட்டுப்படியாகக்கூடிய வகையில் உள்ளது," என்று அவர் கூறினார்.

போக்குவரத்து நெரிசலைத் தவிர்க்கவும், வாகனங்களை எளிதாக நிறுத்தவும், இணையவழியில் முன்கூட்டியே டிக்கெட்டுகளை வாங்குவது உட்படப் பயணத்தை முன்கூட்டியே திட்டமிடுமாறு பொதுமக்களுக்கு அவர் ஆலோசனை வழங்கினார்.

36 வயதான அபர்ணாவுக்கு, இங்கு வழங்கப்படும் வசதிகள் மற்றும் குடும்பங்களுக்கு ஏற்ற சூழல் ஆகியவை பள்ளி விடுமுறையின் போது இந்த இடத்தைத் தேர்ந்தெடுத்ததற்கான முக்கியக் காரணங்களில் அடங்கும்.

அவரது கூற்றுப்படி, குறிப்பாக குழந்தைகள் விளையாடும் பகுதிகளைக் கண்காணிக்கப் பணியாளர்கள் இருப்பதால் பாதுகாப்பு அம்சங்களும் திருப்தியளிக்கிறது.

"இந்த இடம் மிகவும் சிறப்பானது. நிறைய வசதிகள் உள்ளன, மற்ற இடங்களை ஒப்பிடும்போது விலையும் குறைவு. நிச்சயமாக மற்றவர்களுக்கும் இந்த இடத்தைப் பரிந்துரைப்பேன்," என்று அவர் கூறினார்.

இதற்கிடையில், நீர் விளையாட்டுப் பூங்காக்கள் போன்ற பொழுதுபோக்கு இடங்கள், பதின்ம வயதினருக்கும் குடும்பங்களுக்கும் ஒரு மகிழ்ச்சியான சூழலில் நேரத்தைச் செலவிட வாய்ப்பளிக்கின்றன என்று 17 வயதான டேனியல் அதாம் முகமது முஸாபர் ஃபைஸ் கூறினார்.

"நீங்கள் சீக்கிரம் வந்தால் நாள் முழுவதும் விளையாடலாம், அது மிகவும் பயனுள்ளதாக இருக்கும். ஆனால் உணவுப் பிரிவில் மட்டும் 30 நிமிடங்களுக்கும் மேல் காத்திருக்க வேண்டியுள்ளது," என்று அவர் கூறினார்.

இந்த வாரம் தொடங்கிய பள்ளி விடுமுறைப் பருவத்தில், பல்வேறு உள்ளூர் பொழுதுபோக்கு மற்றும் சுற்றுலாத் தலங்களுக்கு வரும் பார்வையாளர்களின் எண்ணிக்கை அதிகரித்துள்ளது. பல குடும்பங்கள் தங்கள் குழந்தைகளுடன் ஓய்வு நேரத்தைக் கழிக்க அருகில் உள்ள இடங்களுக்குச் செல்வதையே மாற்று வழியாகத் தேர்ந்தெடுக்கின்றனர்.

நீர் விளையாட்டுப் பூங்காக்கள் மட்டுமின்றி, ஷா ஆலாம் ஏரியைச் சுற்றியுள்ள பொழுதுபோக்கு இடங்கள், ஷா ஆலாம் தேசியத் தாவரவியல் பூங்கா, ஐ-சிட்டி (i-City) மற்றும் ராஜா துன் உடா நூலகம் போன்ற நகரின் பல பிரபலமான இடங்களுக்கும் பொதுமக்கள் வருகை தருகின்றனர். இவை முழு குடும்பத்திற்கும் பல்வேறு பொழுதுபோக்கு, கல்வி மற்றும் கேளிக்கை நடவடிக்கைகளை வழங்குகின்றன.

பலவிதமான சுற்றுலாத் தலங்களின் தேர்வுகள், எளிதில் அணுகக்கூடிய வசதிகள் மற்றும் குடும்பத்திற்கு ஏற்ற சூழல் ஆகியவை, பள்ளி விடுமுறைக் காலத்தில் கிள்ளான் பள்ளத்தாக்கு மக்கள் பொழுதுபோக்குவதற்கும் தங்கள் குடும்பத்துடன் தரமான நேரத்தைச் செலவிடுவதற்கும் ஷா ஆலமைத் தொடர்ந்து விருப்பமான இடங்களில் ஒன்றாக மாற்றியுள்ளன.