மலேசியா மாஸ்டர்ஸ் மோசமான ஆட்டத்திற்கு பிறகு BAM-க்கு 'ரீசெட்' தேவை: ஒழுக்கம், மனப்பான்மையில் கவனம்

கோலாலம்பூர், மே 25: 2026 மலேசியா மாஸ்டர்ஸ் பேட்மிண்டன் போட்டியில் தேசிய வீரர்களின் முடிவுகள் எதிர்பார்த்தபடி அமையவில்லை என்று மலேசிய பேட்மிண்டன் சம்மேளனத்தின் (BAM) தலைவர்  டத்தோ தெங்கு ஜஃப்ருல் அஜீஸ்
விவரித்துள்ளார்.

இனிமேல் சாக்குப்போக்குகள் சொல்வது போதுமானதாக இருக்காது என்றும், சம்பந்தப்பட்ட தரப்பினர் உடனடியாக தங்களை 'ரீசெட்' (reset) செய்து கொண்டு, உயர்மட்ட போட்டிகளில் போட்டியிட்டு வெல்வதற்கு ஒழுக்கம், சீரான செயல்திறன் மற்றும் மனப்பான்மை போன்ற அடிப்படை அம்சங்களில் கவனம் செலுத்த வேண்டும் என்றும் அவர் கூறினார்.

"பயிற்சி முறைகளை மேம் படுத்துவது மற்றும் வரவிருக்கும் போட்டிகளுக்கான கவனத்தை வலுப்படுத்துவது உட்பட பல்வேறு மேம்பாட்டு நடவடிக்கைகளை BAM செயல்படுத்தும்," என்று அவர் இன்று தனது இன்ஸ்டாகிராம் பதிவில் தெரிவித்தார்.

நிர்ணயிக்கப்பட்ட இலக்குகளை அடைவதற்கு வீரர்கள், பயிற்சியாளர்கள் மற்றும் நிர்வாகத்தினர் உட்பட அனைத்து தரப்பினரும் பொறுப்பேற்க வேண்டும் என்று தெங்கு ஜஃப்ருல் அஜீஸ் கூறினார்.

"உயர்மட்ட விளையாட்டுகளில், பெயர் மட்டுமே போதாது. செயல்திறன் சீராக இருக்க வேண்டும். தொடர்ந்து போராடுங்கள். நமது பயணம் இன்னும் முடிவடையவில்லை," என்று அவர் மேலும் குறிப்பிட்டார்.

முன்னதாக, கடந்த சனிக்கிழமை நடைபெற்ற ஆடவர் இரட்டையர் பிரிவு அரையிறுதி ஆட்டத்தில் தேசிய ஜோடிகளான ஆரோன் சியா - சோ வூய் யிக் மற்றும் வான் ஆரிஃப் வான் ஜுனைடி - யாப் ராய் கிங் ஆகியோர் தோல்வியடைந்ததைத் தொடர்ந்து, 2026 மலேசியா மாஸ்டர்ஸ் போட்டியின் இறுதிப் போட்டிக்கு BAM பிரதிநிதிகள் யாரும் முன்னேறவில்லை.

சக நாட்டு வீரர்களான ஆரோன் - வூய் யிக் ஜோடியை வீழ்த்தி மேன் வெய் சோங் - டீ காய் வுன் ஜோடி சாம்பியன் பட்டம் வென்ற கடந்த ஆண்டு முடிவோடு ஒப்பிடுகையில், இம்முறை மலேசியாவின் நிலை முற்றிலும் மாறுபட்டதாக அமைந்துள்ளது.

-- பெர்னாமா