உலகளாவிய பொருளாதார சவால்களை எதிர்கொள்ள தொழில்நுட்பம் மற்றும் R&D-ஐ ஆராயுமாறு SME-களுக்கு இன்வெஸ்ட் சிலாங்கூர் வலியுறுத்தல்

ஷா ஆலம், மே 22: பெருகிவரும் உலகளாவிய பொருளாதார சவால்களுக்கு மத்தியில் போட்டித்தன்மையுடன் திகழ, சிறு, குறு மற்றும் நடுத்தர நிறுவனங்கள் (SME) தொழில்நுட்பப் பயன்பாடு, புத்தாக்கம், அத்துடன் ஆராய்ச்சி மற்றும் மேம்பாடு (R&D) ஆகியவற்றில் அதிக கவனம் செலுத்த வேண்டும்.

இன்வெஸ்ட் சிலாங்கூர் (Invest Selangor) தலைமை நிர்வாக அதிகாரி டத்தோ ஹாசன் அஸாரி இட்ரிஸ் கூறுகையில், SME-கள் தற்போதைய நிலவரங்கள் குறித்து விழிப்புடன் இருக்க வேண்டும் என்றும், உள்ளூர் மற்றும் சர்வதேச அளவில் அதிகரித்து வரும் சவால்களை எதிர்கொள்ளும் திறனை மேம்படுத்திக் கொள்ள வேண்டும் என்றும் தெரிவித்தார்.

"அவர்கள் தயாராக இருக்க வேண்டும், நடப்பு சூழல்களை அறிந்திருக்க வேண்டும், தொழில்நுட்பம் மற்றும் புத்தாக்கத்தின் அளவை உயர்த்த வேண்டும், மேலும் R&D-ஐ தொடர்ந்து வலுப்படுத்த வேண்டும்.

"R&D என்பது வெறும் புதிய தயாரிப்புகளை உருவாக்குவதில் மட்டுமே கவனம் செலுத்துவதில்லை, மாறாக நிறுவனங்களின் செயல்திறன் மற்றும் போட்டித்தன்மையை மேம்படுத்த உதவும் வணிக செயல்பாடுகள் மற்றும் செயல்முறைகளையும் இது உள்ளடக்கியுள்ளது," என்று நேற்று இங்கு நடைபெற்ற 'Invest Selangor Update Series: Insights into the Latest Opportunities for SMEs & MTCs' நிகழ்ச்சியில் கலந்து கொண்டபோது அவர் மீடியா சிலாங்கூரிடம் தெரிவித்தார்.

SME-கள் தங்கள் வணிகங்களை விரிவுபடுத்த உதவுவதோடு, அரசாங்கம் வழங்கும் பல்வேறு உதவி மற்றும் மேம்பாட்டுத் திட்டங்கள் குறித்த விழிப்புணர்வை ஏற்படுத்துவதே இந்த முன்னெடுப்பின் நோக்கமாகும் என்று ஹசான் கூறினார்.

"திறன் மேம்பாடு, அறிவை வளர்த்துக் கொள்ளுதல், சந்தை வாய்ப்புகள் மற்றும் உற்பத்தித்திறன் தொடர்பான முன்னெடுப்புகள் உட்பட, தங்களின் வணிகத் திறனை வலுப் படுத்தக் கிடைக்கும் அரசாங்க ஆதரவுகள் குறித்து இன்னும் பல SME தொழில் முனைவோருக்குத் தெரியவில்லை.

"இன்வெஸ்ட் சிலாங்கூர் அப்டேட் சீரிஸ் (Invest Selangor Update Series) போன்ற நிகழ்ச்சிகள், தற்போதைய பொருளாதாரம் மற்றும் வணிக சவால்கள் குறித்து தொழில்முனைவோருக்கு விழிப்புணர்வை வழங்குவதோடு, சம்பந்தப்பட்ட அரசாங்க நிறுவனங்களின் ஆதரவுடன் அதற்கான தீர்வுகளைக் கண்டறியவும் உதவுகிறது," என்று அவர் மேலும் கூறினார்.

SME-கள் தங்கள் வணிக அறிவு மற்றும் திறன்களை மேம்படுத்துவது, சந்தை வாய்ப்புகளை விரிவுபடுத்துவது, உற்பத்தித் திறனை அதிகரிப்பது மற்றும் தயாரிப்புகளின் தரத்தை மேம்படுத்துவது ஆகியவற்றில் தொடர்ந்து கவனம் செலுத்துமாறும் அவர் ஊக்குவித்தார்.

இதற்கிடையில், விரைவில் அறிமுகப்படுத்தப்படவுள்ள இரண்டாவது சிலாங்கூர் திட்டம் (RS-2), அதிக வேலைவாய்ப்புகளை உருவாக்குவதன் மூலம் பெரிய நிறுவனங்கள், SME-கள் மற்றும் மக்கள் என அனைத்து தரப்பினரும் பொருளாதாரப் பலன்களைப் பெறுவதை உறுதி செய்வதை நோக்கமாகக் கொண்டுள்ளது என்று ஹசான் கூறினார்.

"முதலீடு மற்றும் வணிக நடவடிக்கைகள் அதிகரிப்பது பல்வேறு துறைகளிலும் பரந்த பொருளாதார நன்மைகளை உருவாக்கும் என்பதால், வேலைவாய்ப்புகளை உருவாக்குவதே உள்ளடக்கிய பொருளாதார வளர்ச்சிக்கான முக்கிய உந்து சக்தியாகத் தொடர்கிறது. அதிக வணிக மற்றும் முதலீட்டு நடவடிக்கைகள் நடைபெறும் போது, தயாரிப்புகள், வீடுகள் மற்றும் பல்வேறு சேவைகளுக்கான தேவையும் தானாகவே அதிகரிக்கும்," என்று அவர் விளக்கினார்.

நீண்ட கால வளர்ச்சி திறனை வலுப்படுத்த, இன்வெஸ்ட் சிலாங்கூர் மற்றும் பிற அரசாங்க நிறுவனங்கள் வெளியிடும் அதிகாரப்பூர்வ அறிவிப்புகளைத் தொடர்ந்து கண்காணிக்குமாறும், மேம்பாட்டுத் திட்டங்களில் பங்கேற்குமாறும், அத்துடன் புதிய சந்தைகள் மற்றும் தொழில்நுட்பங்களை ஆராயுமாறும் SME-களை அவர் கேட்டுக்கொண்டார்.