வெள்ளப் பிரச்சினையை திறமையாக கையாள 'சிலாங்கூர் மாநில அரசு வெள்ளத் தணிப்பு டாஷ்போர்டு' செயலியை அறிமுகப்படுத்தியுள்ளது.

ஷா ஆலம்: வெள்ளப் பிரச்சினையை மிகவும் திறம்படக் கையாள்வதற்கான ஒரு புதிய படியாக, மாநில அரசு 'சிலாங்கூர் வெள்ளத் தணிப்பு டாஷ்போர்டு' (Dashboard Mitigasi Banjir Selangor) என்ற செயலியை அறிமுகப் படுத்தியுள்ளது.

இந்தச் செயலி மூலம், பொதுமக்கள் நீர் கதவுகளின் நிலை, தடுப்புக் குளங்கள், மழைப்பொழிவு தரவுகள் மற்றும் வடிகால் அமைப்புகள் போன்ற தகவல்களைத் தங்களின் திறன்பேசிகள் வழியாக நேரடியாகச் சரிபார்க்கலாம் என்று மேரு சட்டமன்ற உறுப்பினர் மரியம் அப்துல் ரஷீத் கூறினார்.

"அனைத்தும் வெளிப்படையாக உள்ளன. மழைப்பொழிவு மற்றும் வடிகால் அமைப்பு தரவுகள் ஒரே அமைப்பில் ஒருங்கிணைக்கப் பட்டுள்ளதால், ஒரு மக்கள் பிரதிநிதியாக, மாநில சட்டமன்றத்தில் உறுதியான உண்மைகள் மற்றும் முழுமையான தரவுகளின் அடிப்படையில் என்னால் பேச முடியும்."

"முதல் சிலாங்கூர் திட்டத்தின் (RS-1) கீழ் வழங்கப்பட்ட வாக்குறுதிகளை நிறைவேற்றுவதில் அரசாங்கம் முன்னுரிமை அளிக்கிறது என்பதை இந்த முயற்சி நிரூபிக்கிறது. இது வெறும் அரசியல் வாக்குறுதி அல்ல," என்று அவர் கூறினார்.

மாட்சிமை தங்கிய சிலாங்கூர் சுல்தான் அவர்களுக்கு நன்றி தெரிவிக்கும் தீர்மானத்தின் மீதான விவாதத்தில் உரையாற்றியபோது மரியம் இவ்வாறு கூறினார்.

கடந்த பிப்ரவரியில் அறிமுகப்படுத்தப்பட்ட இந்த டாஷ்போர்டு, சிலாங்கூர் முழுவதும் வெள்ளத் தடுப்புத் திட்டங்களின் முன்னேற்ற நிலையை வெளிப்படையாகக் காண்பிப்பதற்காக மாநில அரசு மற்றும் மாநில நீர்ப்பாசனம் மற்றும் வடிகால் துறையின் (JPS) கூட்டு முயற்சியாகும்.

பயனர்களுக்கு எளிதான இந்த அமைப்பு, புவியியல் தகவல் அமைப்பு (GIS) மற்றும் ArcGIS Server மென்பொருள் தொழில்நுட்பத்தைப் பயன்படுத்தி, ஜே.பி.எஸ் ஊழியர்களால் முழுமையாக உள் நாட்டிலேயே உருவாக்கப் பட்டது.

இதற்கிடையில், வெள்ளப் பிரச்சினையை முழுமையாகத் தீர்ப்பதில் மாநில அரசு எதிர்கொள்ளும் முக்கிய சவால் இப்போது பராமரிப்பு அம்சங்களில் உள்ளது, குறிப்பாக உள்ளூராட்சி மன்றங்கள் (PBT) மட்டத்தில் என்று மரியம் குறிப்பிட்டார்.

மாநிலத்தின் அனைத்துப் பகுதிகளும், குறிப்பாக மேரு, இனி திடீர் வெள்ளத்தால் பாதிக்கப்படாமல் இருப்பதை உறுதி செய்வதில், உள் வடிகால் அமைப்புகளின் திறமையான பராமரிப்பு ஒரு முக்கிய காரணியாகும் என்று அவர் கூறினார்.

எனவே, வடிகால் அமைப்புகள் எப்போதும் தயார் நிலையில் இருப்பதை உறுதிசெய்ய, பராமரிப்பு அட்டவணையைப் பொதுமக்களின் பார்வைக்குத் திறக்க வேண்டும் என்று மரியம் பரிந்துரைத்தார்.

"அடைபட்ட கால்வாய்ப் பிரச்சினைக்கு முறையாகத் தீர்வு காணப்படாத வரை, மேருவில் திடீர் வெள்ளப் பிரச்சினை தீர்க்கப்படாது என்பதை நான் எழுப்ப விரும்புகிறேன்," என்றார்.

கடந்த திங்கட்கிழமை, பலமுறை நினைவூட்டல்கள் வழங்கப்பட்ட போதிலும், சிலாங்கூரில் வெள்ளப் பிரச்சினை மீண்டும் மீண்டும் ஏற்படுவது குறித்து மாட்சிமை தங்கிய சிலாங்கூர் சுல்தான் ஷரஃபுடின் இட்ரிஸ் ஷா அல்ஹாஜ் தனது ஏமாற்றத்தை வெளிப் படுத்தியிருந்தார்.

#Selangor #BanjirSelangor #FloodMitigation #SmartSelangor #AplikasiBanjir #JPSselangor #MariamAbdulRashid #DewanNegeriSelangor