ஷா ஆலம், ஏப்ரல் 17: கிராமப்புறங்களில் மலிவு விலை வீடுகளின் விலை நியாயமாக இருந்தாலும், விற்பனை மந்தமாக இருப்பதால் அத்திட்டங்கள் சவால்களை எதிர்கொள்வதாக வீடமைப்பு ஆட்சிக்குழு உறுப்பினர் டத்தோ போர்ஹான் அமான் ஷா கூறினார்.
கோல சிலாங்கூர் மற்றும் சிப்பாங் போன்ற பகுதிகளில் மலிவு விலை வீடுகள் நியாயமான விலையில் விற்கப்பட்டாலும், வாங்குபவர்கள் வீட்டின் இருப்பிடம் மற்றும் வகை போன்ற பல காரணங்களால் தடைகளை எதிர்கொள்வதாக அவர் தெரிவித்தார்.
"நாங்கள் மலிவு விலை வீடுகளை வழங்குகிறோம், ஆனால் வாங்குவோர் குறைவாகவே உள்ளனர். வாங்குபவர்களின் நிலையற்ற வருமானம் காரணமாக வங்கிகள் கடனுதவிக்கு ஒப்புதல் அளிப்பதில் சிரமம் ஏற்படுவது ஒரு முக்கிய காரணமாகும்."
"இரண்டாவது காரணம், கிராமப்புறங்களில் உள்ள பெரும்பாலான வாங்குபவர்கள், மாடி வீடுகள், நிலத்துடன் கூடிய வீடுகள் அல்லது குறைந்தபட்சம் டவுன்ஹவுஸ் வகை வீடுகளுக்கே முன்னுரிமை அளிக்கின்றனர்," என்று அவர் மீடியா சிலாங்கூரிடம் கூறினார்.
எனவே, வீடுகளை வாங்குபவர்களுக்கு கடனுதவி வழங்குவதில் உள்ள நிபந்தனைகளைத் தளர்த்த வங்கிகளுடன் இணைந்து செயல்படுவது குறித்து மாநில அரசு ஆய்வு செய்து வருவதாக அவர் குறிப்பிட்டார்.
விற்பனையை ஊக்குவிக்கும் நோக்கில், கிராமப்புறங்களில் உள்ள வியூக முக்கியத்துவம் வாய்ந்த இடங்களில் அதிக எண்ணிக்கையிலான மாடி வீடுகள் அல்லது டவுன்ஹவுஸ் வகை வீடுகளைக் கட்டவும் மாநில நிர்வாகம் திட்டமிட்டுள்ளது.
"வங்கிக் கடன் நிபந்தனைகளைத் தளர்த்துவது போன்ற வழிகளில் வாங்குபவர்களுக்கு உதவ நாங்கள் ஆய்வு செய்து வருகிறோம். நகர்ப்புறங்களை விட புறநகர்ப் பகுதிகளில் மாடி வீடுகளையே பலர் விரும்புகிறார்கள்," என்றார்.
மேலும், சமூகத்தின் அனைத்துத் தரப்பினரின் தேவைகளைப் பூர்த்தி செய்வதற்காகப் பொது வீடமைப்பு மற்றும் வர்த்தக மேம்பாட்டுத் திட்டங்களை சமநிலைப்படுத்த தனது தரப்பு எப்போதும் முயற்சிப்பதாக போர்ஹான் வலியுறுத்தினார்.
ஒவ்வொரு உள்ளூராட்சி மன்றமும் (PBT) மேம்பாட்டாளர்களுக்கு திட்டமிடல் அனுமதியை வழங்குவதற்கு முன், தொடர்புடைய அனைத்து காரணிகளையும் ஆராய்ந்து இந்தச் செயலாக்கம் மேற்கொள்ளப்படுவதாக அவர் கூறினார்.
"நாங்கள் நடுத்தர விலையில் வீடுகளைக் கட்டினாலும், அப்பகுதியில் சமூக, சுற்றுச்சூழல் மற்றும் பிற செயல்பாடுகளையும் நாங்கள் பாதுகாக்கிறோம்.
எனவே, உள்ளூராட்சி மன்றங்கள் அக்கறை காட்டி அனைத்து காரணிகளையும் கருத்தில் கொள்ளுமாறு கேட்டுக்கொள்கிறோம்," என்றார்.
