பள்ளத்தாக்கு பகுதியில் இருந்து வெளியேறும் முக்கிய நெடுஞ்சாலைகளில் போக்குவரத்து நெரிசல் அதிகரிக்கத் தொடங்கியது

கோலாலம்பூர், மார்ச் 18 - ஈகைத் திருநாளைக் கொண்டாடுவதற்காக பொதுமக்கள் தங்கள் சொந்த ஊர்களுக்குத் திரும்பத் தொடங்கியுள்ளதால், கிள்ளான் பள்ளத்தாக்கிலிருந்து வெளியேறும் வடக்கு, தெற்கு மற்றும் கிழக்கு கடற்கரை திசைகளை நோக்கிய பிரதான நெடுஞ்சாலைகளில் இன்று மாலை நிலவரப்படி போக்குவரத்து நெரிசல் அதிகரித்துள்ளது.

மலேசிய நெடுஞ்சாலை வாரியத்தின் (LLM) பேச்சாளர் கூறுகையில், வடக்கு நோக்கிச் செல்லும் பிளஸ் (PLUS) நெடுஞ்சாலையில், சிலிம் ரிவர் முதல் சுங்கை வரையிலும், தாப்பா முதல் கோப்பேங் வரையிலும், ஜூரு முதல் பிராய் வரையிலும், செபராங் ஜெயா முதல் சுங்கை டூவா சுங்கச்சாவடி வரையிலும் போக்குவரத்து நெரிசல் ஏற்பட்டுள்ளதாகத் தெரிவித்தார்.

"கிழக்கு கடற்கரை திசையில், கோலாலம்பூர்-காராக் நெடுஞ்சாலையில் கோம்பாக் முதல் கெந்திங் செம்பா வரையிலும், புக்கிட் திங்கி முதல் லெந்தாங் வரையிலும், பெந்தோங் ஓய்விடத்திலிருந்து பெந்தோங் சுங்கச்சாவடி வரையிலும் போக்குவரத்து மெதுவாக நகர்கிறது. கிழக்கு கடற்கரை நெடுஞ்சாலை 2-இல் (LPT2) உள்ள கோல திரங்கானு சுங்கச்சாவடியிலும் வாகனங்கள் அணிவகுத்து நிற்கின்றன," என்று அவர் இன்று பெர்னாமாவிடம் தெரிவித்தார்.

தெற்கு திசையைப் பொறுத்தவரை, பிளஸ் நெடுஞ்சாலையில் சுங்கை பீசி சுங்கச் சாவடியிலிருந்து புத்ரா மலேசியப் பல்கலைக்கழகம் (UPM) வரையிலும், நீலாய் முதல் பண்டார் ஐன்ஸ்டேல் வரையிலும், செடெனாகிலிருந்து கூலாய் வரையிலும், செத்தியா திரோப்பிக்காவிலிருந்து பாசிர் கூடாங் வரையிலும் போக்குவரத்து நெரிசல் காணப்படுகிறது.

மேலும், பெரும்பாலான பகுதிகளில் இன்று மாலை வானிலை சீராக உள்ளதாகவும், கிள்ளான் பள்ளத்தாக்கைச் சுற்றி மட்டுமே மழை பெய்ததாகவும் அவர் குறிப்பிட்டார்.

வாகன ஓட்டிகள் நிர்ணயிக்கப்பட்ட வேக வரம்பைக் கடைப்பிடிக்குமாறும், பயணத்தின் போது தங்களின் வாகனங்களுக்கு இடையில் பாதுகாப்பான தூரத்தைப் பேணுமாறும் அறிவுறுத்தப் படுகிறார்கள்.

பயணிகள் தங்கள் பயணத்தைத் திட்டமிட 'MyPLUS-TTA' செயலியைப் பயன்படுத்தவும், கட்டணமில்லா தொலைபேசி எண்களான PLUSLine 1-800-88-0000 மற்றும் LLM 1-800-88-7752 அல்லது @plustrafik மற்றும் @llmtrafik ஆகிய எக்ஸ் (X) பக்கங்கள் வழியாகவும்  போக்குவரத்துத் தகவல்களைப் பெறலாம்.

-- பெர்னாமா