ஷா ஆலாம், ஜனவரி 18: கோத்தா கெமுனிங் பகுதியில் வசிப்பவர்கள், சட்டச் சிக்கல்கள் தொடர்பான ஆரம்பக்கட்ட ஆலோசனைகள் மற்றும் வழிகாட்டல்களைப் பெறுவதற்கு, கோத்தா கெமுனிங் சட்டமன்றத் தொகுதி சேவை மையத்தில் வழங்கப்படும் அடிப்படைச் சட்ட உதவி சேவையைப் பயன்படுத்திக் கொள்ளுமாறு ஊக்குவிக்கப்படுகிறார்கள்.
சட்டத் தகவல்கள் அனைவருக்கும் சமமாகக் கிடைக்க வேண்டும் என்பதை உறுதி செய்வதே இந்த முயற்சியின் நோக்கம் என்று அத்தொகுதி சட்டமன்ற உறுப்பினர் பிரகாஷ் சம்புநாதன் தெரிவித்தார். குறிப்பாக, வழக்கறிஞர் கட்டணம் மற்றும் இதர செலவுகளால் சட்ட ஆலோசனைகளைப் பெறத் தயங்கும் நடுத்தர மற்றும் குறைந்த வருமானம் கொண்ட பிரிவினருக்கு இது பெரிதும் உதவும் என்று அவர் குறிப்பிட்டார்.
"இந்தச் சேவை முறையான சந்திப்பு அடிப்படையில் மட்டுமே வழங்கப்படும். இதன் மூலம் ஒவ்வொரு விண்ணப்பதாரரின் தேவைகளிலும் முழுமையாகக் கவனம் செலுத்தி, அவர்களுக்குச் சிறந்த வழிகாட்டல்களை வழங்க முடியும். "சட்டம் தொடர்பான சிக்கல்களில் சிக்கித் தவிக்கும் மக்களுக்கு ஆரம்பக்கட்ட ஆலோசனைகளை வழங்குவதற்காகவே இந்தச் சட்ட உதவி மையம் உருவாக்கப்பட்டது," என்று அவர் தனது முகநூல் பதிவில் தெரிவித்துள்ளார்.
இந்தச் சேவையைப் பயன்படுத்த விரும்பும் பொதுமக்கள், அதிகாரப்பூர்வ விளம்பர சுவரொட்டியில் உள்ள QR குறியீட்டை ஸ்கேன் செய்வதன் மூலமாகவோ அல்லது வழங்கப்பட்டுள்ள இணையப் பக்கத்தின் வாயிலாகவோ தங்களைப் பதிவு செய்து கொள்ளலாம்.
"சட்டச் சிக்கல்கள் உங்களைச் சுமையாக அழுத்த விடாதீர்கள். இங்கு வந்து தகுந்த வழக்கறிஞர்களிடம் ஆலோசனைகளைப் பெற்றுக்கொள்ளுங்கள். மேலதிக விவரங்களுக்கு 03-5131 4354 அல்லது 011-1257 5460 ஆகிய எண்களைத் தொடர்பு கொள்ளலாம்," என்று அவர் மேலும் பகிர்ந்துள்ளார்.
