ஷா ஆலம், ஜனவரி 5- அரசாங்கம் ஒவ்வொரு மாணவருக்கும் RM150 ஆரம்பப் பள்ளி உதவித்தொகையை (BAP) தொடர்ந்து வழங்கவுள்ளது. இந்த உதவித்தொகை ஒன்று முதல் இரண்டு வாரங்களுக்குள் விநியோகிக்கப்படும் என எதிர்பார்க்கப்படுகிறது.
இந்த உதவி முன்பள்ளி முதல் ஆறாம் படிவம் வரையிலான மாணவர்களுக்கு வழங்கப்படும் என்றும், இதற்கு முன்னர் ஐந்தாம் படிவம் வரை மட்டுமே வழங்கப்பட்டது என்றும் பிரதமர் டத்தோஸ்ரீ அன்வார் இப்ராஹிம் கூறினார்.
இந்த உதவி வழங்குவதற்கு ஒரு நிபந்தனை உள்ளது. பெற்றோர்கள் அல்லது பாதுகாவலர்கள் பள்ளிக்கு கட்டாயம் வர வேண்டும். உதவித்தொகை குழந்தைகளின் தேவைகளுக்கு முழுமையாகப் பயன்படுத்தப்படுவதை உறுதி செய்வதோடு, ஆசிரியர்களுடன் நேரடியாக உரையாடவும் இது உதவும் என்று அவர் கூறினார்.
மேலும் இந்த திட்டத்திற்கு அரசாங்கத்தால் ஒதுக்கப்பட்ட நிதி RM800 மில்லியன் ஆகும்," என்று அவர் இன்று புத்ராஜெயாவில் பிரதமர் துறை (JPM) ஊழியர்களுடன் 2026 புத்தாண்டுச் செய்தியை வழங்கியபோது இவ்வாறு கூறினார்.
2026 வரவுசெலவுத் திட்டத்தை சமர்ப்பித்தபோது, நிதி அமைச்சராகவும் இருக்கும் அன்வார், பள்ளி உபகரணங்களை வாங்குவதற்கான செலவுச் சுமையைக் குறைக்க உதவும் வகையில், பள்ளி மாணவர்களுக்கு RM150 ஆரம்பப் பள்ளி உதவித்தொகை வழங்கப்படும் என்று அறிவித்தார்.
