ஷா ஆலம், மே 30 - வேப் எனப்படும் மின் சிகிரெட் சார்ந்த பொருட்கள் தொடர்பான விளம்பரங்களை ஜூன் 9ஆம் தேதிக்குள் அகற்றக் கோரும் 19 அறிவிப்புகளை கோல லங்காட் நகராண்மைக் கழகம் (எம்.பி.கே.எல்.) வெளியிட்டுள்ளது.
அத்தகைய விளம்பரங்களை ஜூன் 9 ஆம் தேதி அல்லது அதற்கு முன்பாக அகற்றுவதற்கான உத்தரவு 2007ஆம் ஆண்டு கோல லங்காட் நகராண்மைக் கழக விளம்பர துணைச் சட்டத்தின் 7வது பிரிவின் கீழ் பிறப்பிக்கப்பட்டதாக நகராண்மைக் கழகம் தெரிவித்தது.
குறிப்பிட்ட காலத்திற்குப் பிறகும் உத்தரவைப் பின்பற்றத் தவறும் வளாகங்கள் மீது பறிமுதல் நடவடிக்கை எடுக்கப்படும் என்று அது எச்சரித்தது.
கடந்த மே 26 மற்றும் 28 ஆம் தேதிகளில், கோலா லங்காட்டைச் சுற்றியுள்ள பந்திங், தெலுக் பங்லிமா காராங், ஜெஞ்சாரோம் மற்றும் தஞ்சோங் சிப்பாட் உள்ளிட்ட பகுதிகளில் வேப் விற்பனை வளாக உரிமங்களை ஆய்வு செய்யும் நடவடிக்கையை நகராண்மைக் கழகம் அமலாக்கத் துறை மற்றும் லைசென்ஸ் துறை மூலம் மேற்கொண்டது.
விதிமுறைகளுக்கு இணங்காத வேப் தயாரிப்புகளின் விளம்பரம் மற்றும் விற்பனைக்கு எதிரான அமலாக்க முயற்சிகளின் ஒரு பகுதியாக இது உள்ளது என்று நகராண்மைக் கழகம் தனது முகநூல் பதிவில் தெரிவித்தது.
வர்த்தகர்கள் சட்ட விதிகளுக்கு இணங்குவதை உறுதி செய்வதற்கும் சமூகத்தின் நல்வாழ்வு மற்றும் பாதுகாப்பைப் பேணி காப்பதற்கும் குறிப்பாக பொது சுகாதாரத்திற்கு தீங்கு விளைவிக்கும் விளம்பரப் பொருட்கள் தொடர்பான பிரச்சனைகளை கையாள்வதற்கும் தாங்கள் உறுதிபூண்டுள்ளதாக அது குறிப்பிட்டது.
