கோலாலாம்பூர், மே 29 - எதிர்வரும் சனிக்கிழமை தொடங்கி 3 நாட்களுக்கு கெப்போங் மற்றும் சாலாக் செலாத்தான் வழித்தடத்தில் சமிக்ஞை பராமரிப்புப் பணிகள் நடைபெறும்.
இதனால் கிள்ளான் பள்ளத்தாக்கில் KTM Komuter ரயில் சேவையும் ETS இரயில் சேவையும் தற்காலிக அட்டவணை மாற்றத்தை எதிர்கொள்ளும் என KTMB நிறுவனம் அறிக்கை வாயிலாக தெரிவித்துள்ளது.
இந்த தற்காலிக சேவைத் தடங்கலானது, இரயில் போக்குவரத்தின் பாதுகாப்பு மற்றும் ஆக்கப்பூர்வ சேவையை வழங்குவதை உறுதிச் செய்யும் முயற்சிகளின் ஒரு பகுதியாகும் என KTMB விளக்கியது.
Pulau Sebang-Batu Caves-Pulau Sebang @ Tanjung Malim-KL Sentral-Tanjung Malim ஆகிய Komuter இரயில் வழித்தடங்களுக்கான சேவைகளில் 50 நிமிடங்களுக்கு தாமதம் ஏற்படலாம்.
இவ்வேளையில் சனிக்கிழமைக்கான ETS இரயில் சேவை மாற்றமும் அறிவிக்கப்பட்டுள்ளது. Padang Besar-Segamat மற்றும் Butterworth-Segamat வரைக்குமான பயணங்களுக்கான பிளாட்ஃபோம் மாற்றங்கள், KL Sentral மற்றும் Kuala Lumpur இரயில் நிலையங்களை உட்படுத்தியிருக்கும்.
மேலும், ETS தாமதம் குறித்து பயணிகளுக்கு SMS வழியாக தகவல் தெரிவிக்கப்படும்.
பயணிகளும் தங்களின் பயணங்களை முன்கூட்டியே திட்டமிடுவதோடு, KTMB செயலியில் MyRailtime நிகழ்நேர வசதியைப் பயன்படுத்துமாறு கேட்டுக் கொள்ளப்படுகிறது.
அண்மைய ஆசியான் உச்ச நிலை மாநாட்டின் போது ஏராளமானோர் பொது போக்குவரத்தைப் பயன்படுத்தியதால், இந்த தரமுயர்த்தும் பணிகள் ஒத்தி வைக்கப்பட்டன.
