கோல திரங்கானு, பிப். 20 - மோசடி கும்பலின் தொலைபேசி அழைப்பினால்
ஏமாற்றப்பட்ட ஓய்வு பெற்ற மூதாட்டி ஒருவர் தனது சேமிப்பு மற்றும் தனிப்பட்ட முறையில் கடனாகப் பெற்ற மொத்தம் 108,000 வெள்ளித் தொகையை பறிகொடுத்தார்.
தன்னை காப்புறுதி பிரதிநிதி என தன்னை அறிமுகப்படுத்திக் கொண்ட சந்தேக நபர் கடந்த ஜனவரி 10 ஆம் தேதி பாதிக்கப்பட்டவரான 61 வயது மூதாட்டியை தொடர்பு கொண்டதாக கோல திரங்கானு மாவட்ட காவல்துறைத் தலைவர் ஏசிபி அஸ்லி முகமது நூர் கூறினார்.
63,000 வெள்ளி காப்புறுதி கோரிக்கைக்காக அனாமதேய நபர் ஒருவர் உங்கள் பெயரை தவறாகப் பயன்படுத்தியுள்ளார் என அம்மூதாட்டியிடம் சந்தேக நபர் கூறியுள்ளார்.
பின்னர் அந்த தொலைபேசி அழைப்பு ஒரு போலீஸ் அதிகாரி என்று கூறிக்கொள்ளும் ஒரு நபருடன் இணைக்கப்பட்டது. பணமோசடி செய்ததற்காக அந்த மூதாட்டிக்கு எதிராக கைது ஆணை பிறப்பிக்கப்பட்டுள்ளதாக சந்தேக நபர் மிரட்டியுள்ளார்.
பின்னர் உள்ளூர் வங்கியில் புதிய கணக்கைத் திறக்கவும் சந்தேக நபருடன் வங்கித் தகவல்களைப் பகிர்ந்து கொள்ளவும் அம்மூதாட்டிக்கு உத்தரவிடப்பட்டது என்று அவர் இன்று தொடர்பு கொண்டபோது அஸ்லி முகமது கூறினார்.
இந்த மிரட்டலால் பீதியடைந்த அந்தப் பெண் தாபோங் ஹாஜி கணக்கிலிருந்து 45,000 வெள்ளியை புதிய கணக்கிற்கு மாற்றியுள்ளார்.
சந்தேக நபரின் அறிவுறுத்தலின் பேரில் 50,000 தனிநபர் கணக்கிலிருந்து எடுத்து புதிய கணக்கிற்கு மாற்றினார். தனது பெயரை தூய்மைப்படுத்தவும் கைது செய்யப்படுவதைத் தவிர்க்கவும் அம்மூதாட்டி இவ்வாறு செய்துள்ளார் என்றார் அவர்.
இது தவிர அந்த மூதாட்டி மேலும் இரண்டு வெவ்வேறு கணக்குகளுக்கு மொத்தம் 13,000 வெள்ளியை மூன்று பரிவர்த்தனைகள் மூலம் மாற்றியுள்ளார். இதனால் அவருக்கு ஏற்பட்ட மொத்த இழப்பு 108,000 ஆகும் என்று அவர் கூறினார்.
தாம் ஏமாற்றப்பட்டதை உணர்ந்த அந்தப் பெண்மணி நேற்று மாலை போலீசில் புகார் அளித்ததாகவும் குற்றவியல் சட்டம் பிரிவு 420 இன் கீழ் இந்த வழக்கு விசாரிக்கப்பட்டு வருவதாகவும் அவர் கூறினார்.
