பொழுது போக்கு மையத்தில் குடிநுழைவுத்துறை சோதனை- 164 சட்டவிரோதக் குடியேறிகள் கைது

கோலாலம்பூர், செப். 28- ஜாலான் லோக் யூவில் உள்ள பொழுதுபோக்கு

மையம் ஒன்றின் மீது நேற்றிரவு அதிரடிச் சோதனை நடத்திய

குடிநுழைவுத்துறை அதிகாரிகள் 164 சட்டவிரோதக் குடியேறிகளைக்

கைது செய்தனர்.

பேரங்காடி ஒன்றில் அமைந்துள்ள அந்த பொழுது போக்கு மையம்

வெ.1,000 முதல் வெ.100,000 வெள்ளி வரையிலான கட்டணத்தில் அந்நிய

உபசரணை தொடர்பு அதிகாரிகள் (ஜி.ஆர்.ஒ.) சேவையை வழங்கி

வந்ததாகக் கூறப்படுகிறது.

அமலாக்கக் குழுவினர் அந்த பொழுதுபோக்கு மையத்தில் நுழைந்த போது

அவர்களிடமிருந்து தப்ப முயன்ற சில பெண்கள் கீழே விழுந்து

காயங்களுக்குள்ளாயினர்.

அந்த மையத்தில் அதிகாரிகள் மேற்கொண்ட தீவிர சோதனையின் போது

சில ஜி.ஆர்.ஓ.க்கள் கழிப்பறை மற்றும் ஸ்டோர் அறைகளில் பதுங்கிக்

கொண்டனர்.

நேற்றிரவு 11.45 மணி தொடங்கி விடிற்காலை 1.30 மணி வரை நீடித்த

இந்த சோதனை நடவடிக்கையில் 21 முதல் 60 வயது வரையிலான 164

பேர் கைது செய்யப்பட்டனர் என்று கோலாலம்பூர் குடிநுழைவுத்துறை

இயக்குநர் வான் முகமது சவுபி வான் யூசுப் கூறினார்.

கைது செய்யப்பட்டவர்களில் 114 தாய்லாந்து பிரஜைகள், 12

வியட்நாமியர்கள், 27 வங்காளதேசிகள், ஓன்பது சீனப் பிரஜைகளும்

அடங்குவர் என அவர் தெரிவித்தார்.

அவர்கள் அனைவரும் 1963ஆம் ஆண்டு குடிநுழைவுச் சட்டத்தின் பல்வேறு

பிரிவுகளின் கீழ் விசாரணைக்காக தடுத்து வைக்கப்பட்டுள்ளதாக அவர்

மேலும் சொன்னார்.

கைதான சில பெண்கள் நீண்ட கால சோசியல் விசிட் பாஸ் அல்லது

துணைவியர் பாஸ் போன்ற ஆவணங்களை வைத்திருந்தனர். எனினும்

தங்கள் கணவர் எங்கே இருக்கிறார் என்ற விபரம் அவர்களுக்குத்

தெரியவில்லை என்றார் அவர்.

இச் சோதனையின் போது சட்டவிரோதக் குடியேறிகள் சட்டத்திற்கு

புறம்பான முறையில் வேலைக்கு அமர்த்திய குற்றத்திற்காக அந்த

பொழுதுபோக்கு மையத்தின் உரிமையாளரும் நான்கு பராமரிப்பாளர்களும்

கைது செய்யப் பட்டனர் என்று அவர் சொன்னார்.