கோலாலம்பூர், பிப் 28: இந்த ஆண்டு முதல் 2030 ஆம் ஆண்டு வரை கட்டம் கட்டமாக செயல்படுத்தப்படும் வெங்காயப் பயிர் மேம்பாட்டுத் திட்டம், நாட்டின் வெங்காய இறக்குமதியை 30 சதவீதம் குறைக்கும் என எதிர்பார்க்கப் படுவதாக வேளாண் மற்றும் உணவுப் பாதுகாப்பு அமைச்சர் டத்தோஸ்ரீ முகமட் சாபு தெரிவித்தார்.
இந்த ஆண்டு முதல் அடுத்த ஆண்டு வரை வர்த்தகத்திற்கு முந்தைய கட்டம் மற்றும் 2026 முதல் 2030 வரை வணிக கட்டம் என இரண்டு கட்டங்களாக இந்த திட்டம் செயல்படுத்தப்படும்.
வணிகத்திற்கு முந்தைய கட்டம், மலேசியாவில் 70 மெட்ரிக் டன் சின்ன வெங்காய விதைகள் மற்றும் 230 கிலோகிராம் சிறிய வெங்காய விதைகள் மூலம் மலேசியாவில் சின்ன வெங்காய சாகுபடியின் சாத்தியக்கூறுகளை ஆய்வு செய்வதை இத்திட்டம் நோக்கமாகக் கொண்டுள்ளது என்று அவர் கூறினார்.
100 ஹெக்டேர் பரப்பளவில் வெங்காய சாகுபடி, வணிகத்திற்கு முந்தைய கட்டத்தில் ஒரு ஹெக்டேருக்கு ஐந்து மெட்ரிக் டன் உற்பத்தி விளைச்சல் எதிர்பார்க்கப்படுகிறது.
"ஆண்டுக்கு இரண்டு முறை வெங்காய சாகுபடி செய்யலாம். இது வணிகத்திற்கு முந்தைய கட்டத்தில் உற்பத்தி 1,000 மெட்ரிக் டன் வரை இருக்கும் என்று எதிர்பார்க்கப்படுகிறது," என்று அவர் இன்று மக்களவையில் கேள்வி பதில் அமர்வின் போது கூறினார்.
வெங்காய இறக்குமதியை 30 சதவீதம் குறைக்க வேளாண்மை மற்றும் உணவுப் பாதுகாப்பு அமைச்சகத்தின் (கேபிகேஎம்) முயற்சிகள் குறித்த விவரங்களைக் கேட்ட டத்தோ இட்ரிஸ் அஹ்மட்டின் (பிஎன்-பாகான் செராய்) கேள்விக்கு அவர் இவ்வாறு பதிலளித்தார்.
இந்தத் திட்டத்தின் வணிகக் கட்டம் 1,347 ஹெக்டேர் பரப்பளவை அபிவிருத்தி செய்வதோடு 14,470 மெட்ரிக் டன் வெங்காயத்தை உற்பத்தி செய்யும் என்று எதிர்பார்க்கப்படுகிறது என்றார்.
மலேசியாவில் நடவு செய்வதற்கு ஏற்ற வெங்காயம் மற்றும் பூண்டு வகைகளை மார்டி இன்னும் கண்டு பிடிக்கவில்லை என்பதால், இந்த திட்டம் சிறிய வெங்காய செடிகளை மட்டுமே உள்ளடக்கும் என்று அவர் கூறினார்.
- பெர்னாமா
