ஷா ஆலம் , அக் 11- சிலாங்கூர் அரசின் மலிவு விற்பனை நாளை மேலும் ஒன்பது இடங்களில் காலை 9.00 மணி முதல் பிற்பகல் 1.00 மணி வரை நடைபெறவுள்ளது. ஜெலாஜா ஏசான் ராக்யாட் எனும் இத்திட்டம் சுங்கை பாஞ்சாங், தாமான் டெம்பளர், சுங்கை துவா, தாமான் மேடான், கோத்தா டாமன்சாரா, செமெந்தா, சிஜங்காங் மற்றும் சுங்கை பீலேக் ஆகிய தொகுதிகளில் நடைபெறும்.
இந்த மலிவு விற்பனையில் நடுத்தர கோழி 10.00 ரிங்கிட்டுக்கும் பி கிரேடு முட்டை ஒரு தட்டு 10.00 ரிங்கிட்டுக்கும் மீன் ஒரு பாக்கெட் 6.00 ரிங்கிட்டுக்கும் இறைச்சி ஒரு பாக்கெட் 10.00 ரிங்கிட்டுக்கும் விற்கப்படும். இந்த அத்தியாவசிய பொருள் மவிவு விற்பனை கடந்த ஆகஸ்டு 31 ஆம் தேதி முதல் வரும் டிசம்பர் 31ஆம் தேதி வரை நடைபெறுகிறது.
மாநிலத்தின் 56 சட்டமன்றங்களில் உள்ள 260 இடங்களில் இந்த மலிவு விற்பனை நடத்தப் படுகிறது. சிலாங்கூர் மாநில மேம்பாட்டுக் கழகத்தின் ஏற்பாட்டிலான இந்த மலிவு விற்பனையின் வழி இதுவரை 80,000 பேர் வரை பயனடைந்துள்ளனர்.
