செமினி, மார்ச் 1-
நாட்டின் கூட்டரசு அரசியலமைப்பின் பிரதான கொள்கையைத் தற்காக்க பக்காத்தான் அரசாங்கம் உறுதி பூண்டுள்ளது. இது குறித்து எதிர்க்கட்சிகள் கூறிவரும் குற்றச்சாட்டுகள் யாவும் அடிப்படையற்றவை என்று வலியுறுத்தப்பட்டுள்ளது.
நாட்டின் மாமன்னர், நபிகள் நாயகம் மற்றும் இதர சமயங்கள் ஆகியவற்றை இழிவு படுத்துவோரிடம் விட்டுக் கொடுக்கும் போக்கை அரசாங்கம் கடைபிடித்ததில்லை என்றும் பக்காத்தான் கூட்டணியின் துணைத் தலைவர் டான்ஸ்ரீ முஹிடின் யாசின் கூறினார்.
பக்காத்தான் அரசாங்கம் நாட்டின் அதிகாரப்பூர்வ சமயமான இஸ்லாம் மற்றும் மலாய்க்காரர்களின் உரிமைக்காகவும் குரல் கொடுப்பதில்லை என்றும் எதிர்க்கட்சியினர் குறை கூறி வருகின்றனர் என்றார் அவர்.
மலாய்க்காரர்களுக்காவும் இஸ்லாமிய சமயத்திற்காகவும் தாங்கள் மட்டுமே போராடி வருவதாக, இடைத்தேர்தல் பிரச்சாரத்தில் ஈடுபட்டிருக்கும் அம்னோ மற்றும் பாஸ் கட்சி தலைவர்கள் உண்மைக்குப் புறம்பாகப் பேசி வருகின்றனர் என்று முஹிடின் தெரிவித்தார்.
