ஷா ஆலாம், நவ 5 : ஷா ஆலாம், ஜாலான் குபு காஜாவில் (Jalan Kubu Gajah) பாதிக்கப்பட்ட பெய்லி பாலம் (Bailey bridge) மூன்று வாரங்களுக்குள் கட்டி முடிக்கப்படுமென சிலாங்கூர் பொதுப் பணித்துறை தெரிவித்தது.
நேற்று அதிகாலை பெய்த பலத்த மழையால் ஏற்பட்ட மண் அரிப்பு காரணமாக, சுங்கை சுபாங் ஆற்றின் குறுக்கே அமைந்துள்ள இந்த சாலை இடிந்து விழுந்தது.
இதனால் கம்புங் குபு காஜா மற்றும் பாயா ஜாராஸ் ஹிலிர் ஆகிய பகுதிகளை இணைக்கும் முக்கியப் பாதை துண்டிக்கப்பட்டதுடன், அப்பகுதியிலுள்ள சுமார் 4,500-க்கும் மேற்பட்ட வீடுகளுக்கான போக்குவரத்தும் பாதிக்கப்பட்டது.
பயன்பாட்டுத் தூண்களை தற்காலிகமாக மாற்றி அமைக்கும் பணிகளையும் சேர்த்து, இந்தத் தற்காலிக பெய்லி பாலம் அமைக்கும் பணி மூன்று வாரங்களுக்குள் நிறைவடையும் என எதிர்பார்க்கப்படுகிறது.
பாதுகாப்பு காரணங்களுக்காக ஜாலான் குபு காஜா தற்போது அனைத்து வாகனங்களுக்கும் மூடப்பட்டுள்ளதுடன், இதற்கான மாற்றுப் பாதைகள் குறித்த விவரங்கள் பொதுப் பணித் துறையின் பெட்டாலிங் மாவட்ட ஃபேஸ்புக் பக்கத்தில் வெளியிடப்பட்டுள்ளன.
இதற்கிடையில், இப்பகுதியில் புதிய நிரந்தர பாலம் கட்டுவதற்கான அளவீட்டுப் பணிகள் நடந்து வருகின்றன.
இந்த அளவீடுகள் நவம்பர் 16-ஆம் தேதிக்குள் நிறைவடையும் என்றும், புதிய பாலத்தின் கட்டுமானப் பணிகள் அடுத்த ஆண்டு தொடக்கத்தில் ஆரம்பமாகும் என்றும் சிலாங்கூர் பொதுப் பணித் துறை தெரிவித்தது.
பெய்லி பாலம் அமைக்கும் பணி முடிந்து சாலை மீண்டும் திறக்கப்பட்டவுடன் அடுத்தகட்ட அறிவிப்பு வெளியிடப்படும் என்பதால், வாகன ஓட்டிகள் அப்பகுதியிலுள்ள பாதுகாப்பு அறிவிப்புப் பலகைகளைப் பின்பற்றி கவனமாகச் செல்லுமாறு அறிவுறுத்தப்படுகிறார்கள்.