குவந்தான், அக் 12 - சுல்தான் ஹாஜி அஹ்மாட் ஷா போலிடெக்னிக் ( POLISAS) தொழிற்பயிற்சி கூட மாணவியைக் கொலை செய்ததாக , வேலை இல்லாத ஆடவன் மீது இன்று, குவந்தான் மாஜிஸ்திரேட் நீதிமன்றத்தில் குற்றம் சாட்டப்பட்டது.
தன் மீதான குற்றச்சாட்டு வாசிக்கப்பட்டபோது , அதைப் புரிந்துக் கொண்டதாக, வழக்கறிஞர் பிரதிநிதிக்காத 19 வயது எஃப். அலன் ஸ்டீவ்குமார் தலையசைத்தான்.
அந்நபர், கடந்த அக்டோபர் 6-ஆம் தேதி, காலை மணி 4.32-க்கும் 4.55-கும் இடைப்பட்ட காலத்தில், இங்குள்ள ஆயிர் புத்தே சாலையில், 19 வயது எம். எலிசா ஜோனோவா-வைக் கொலை செய்ததாக குற்றம் சாட்டப்பட்டது.
குற்றவியல் சட்டம் செக்க்ஷன் 302-வது பிரிவின் கீழ் அந்த குற்றச்சாட்டு சுமத்தப்பட்டது.
அச்சட்டப் பிரிவின் கீழ் குற்றம் நிரூபிக்கப்பட்டால், மரண தண்டனை அல்லது மரண தண்டனை விதிக்கப்படாவிட்டால் 30 -லிருந்து 40 ஆண்டுகள் வரை சிறையும் 12 முறைக்கும் குறையாத பிரம்படியும் தண்டனையாக விதிக்க முடியும்.
பிரேத பரிசோதனை அறிக்கை மற்றும் போதைப் பொருள் , நச்சுப் பரிசோதனை அறிக்கையை சமர்பிப்பதற்காக, இந்த வழக்கு நவம்பர் 12- ஆம் தேதி செவிமடுக்கப்படும்.
குற்றம் சாட்டப்பட்ட ஸ்டீவ்குமார், எலிசாவின் காதலன் என நம்பப்படுகிறது.