கோலாலம்பூர், அக்டோபர் 7 – ரயில்வே சொத்துக் கழகத்திற்குச் (RAC) சொந்தமான நிலத்தைக் குத்தகைக்கு எடுத்துள்ள 49 வழிபாட்டுத் தலங்கள் மற்றும் நான்கு பகுதி உதவிப் பெறும் பள்ளிகள் (Sekolah Bantuan Modal) உட்பட மொத்தம் 53 குத்தகைதாரர்கள், இப்போது மாதத்திற்கு வெறும் RM1 என்ற சிறப்பு வாடகை விகிதத்தை அனுபவித்து வருகின்றனர்.
இரயில் பாதையோரம் உள்ள நிலங்களின் வாடகைக் கட்டணத்தைச் சீரமைப்பதற்காக இந்த புதிய வாடகை விகிதம் கடந்த அக்டோபர் 1 முதல் அமலுக்கு வந்துள்ளது என போக்குவரத்து அமைச்சர் அந்தோனி லோக் தெரிவித்தார்.
இதற்கு முன்பு இந்த வாடகை மாதத்திற்கு RM100 முதல் RM150 வரை வேறுபட்டதாக இருந்தது.
"முன்பு நம்மிடம் ஒரு தெளிவான கொள்கை இருக்கவில்லை. சிலருக்கு சந்தை விலையைப் பின்பற்றாத பெயரளவு கட்டணம் விதிக்கப்பட்டது. சிலருக்கு RM100 மற்றும் சிலருக்கு RM150 விதிக்கப்பட்டது, அதனால் கட்டணங்கள் சீராக இல்லை."
"எனவே, இந்த இரயில் பாதையோரம் உள்ள அனைத்து வழிபாட்டுத் தலங்களுக்கும் பள்ளிகளுக்கும் மாதத்திற்கு RM1 என்ற ஒரே மாதிரியான பெயரளவு கட்டணத்தை நிர்ணயிக்க நாங்கள் ஒரு முடிவை எடுத்துள்ளோம்," என்று அவர் கூறினார்.
இன்று இங்கு நடைபெற்ற 'சிறப்பு வாடகை கட்டண அறிவிப்புக் கடிதம்' வழங்கும் விழாவின் போது செய்தியாளர் சந்திப்பில் அவர் இதனைத் தெரிவித்தார்.
இந்தச் சிறப்பு வாடகைக் கட்டண அமலாக்கம் என்பது பெருநிறுவன சமூகப் பொறுப்பு (CSR) திட்டத்தின் ஒரு பகுதியாகும் என்றும், இதற்கு முன்பு வெவ்வேறு கட்டணங்களைச் செலுத்தி வந்த குத்தகைதாரர்களுக்கு இது வசதியை ஏற்படுத்தும் என்றும் அவர் கூறினார்.
குத்தகைதாரர்களுக்கு மூன்று ஆண்டுகள் குத்தகைக்காலம் வழங்கப்படும் என்றும், அதே வாடகை விகிதத்தில் மேலும் இரண்டு முறை கால நீட்டிப்பு செய்துகொள்ளும் வாய்ப்பு வழங்கப்படும் என்றும் அவர் கூறினார்.
இதன் மூலம் மொத்த குத்தகைக்காலம் ஒன்பது ஆண்டுகள் வரை நீடிக்கும்.
இந்த அணுகுமுறை குத்தகைதாரர்களின் நிர்வாகச் செயல்பாடுகளை எளிதாக்கும், ஏனெனில் குத்தகைக்காலம் முடிந்த பிறகுதான் புதிய விண்ணப்பத்தைச் சமர்ப்பித்து கையெழுத்திட வேண்டும்.
இருப்பினும், இந்த நிலங்கள் 'நிலக்காப்பு' (Status Tanah Rizab) அந்தஸ்தைக் கொண்டவை என்றும், இவற்றை குத்தகைதாரர்களுக்கு நிரந்தரமாக வழங்க முடியாது என்றும் அவர் திட்டவட்டமாக வலியுறுத்தினார்.
"நாங்கள் புதிய இரயில் பாதைகளை மேம்படுத்தாதவரை, அவர்கள் அங்கு தொடர்ந்து இருக்க முடியும். ஆனால், அரசாங்கத்தின் வளர்ச்சித் திட்டங்கள் ஏதேனும் வரும்போது, உதாரணமாக கூடுதல் இரயில் பாதை விரிவாக்கத் திட்டங்கள் வரும்போது, அந்த நிலத்தை மீண்டும் அரசாங்கத்திடம் ஒப்படைக்க வேண்டும்," என்று அவர் கூறினார்.