ஷா ஆலாம், அக் 7 : பெரிமெனோபாஸ் (Perimenopause - மாதவிடாய் நிறுத்தத்திற்கு முந்தைய கட்டம்) என்பது வெறும் ஒழுங்கற்ற மாதவிடாய் பற்றியது மட்டுமல்ல ;
இந்த காலகட்டத்தில் ஏற்படும் ஹார்மோன் மாற்றங்கள் பெண்களின் நீண்டகால ஆரோக்கிய அபாயங்களுடன் தொடர்புடையவை என்று மருத்துவ நிபுணர் தெரிவித்தார்.
இந்த கட்டம் ஒரு பெண்ணுக்கு 40 வயதிலேயே தொடங்கலாம் மற்றும் மாதவிடாய் நிறுத்தத்திற்கு (Menopause) முன்பு 8 முதல் 10 ஆண்டுகள் வரை நீடிக்கலாம் என ஃபெம்மா கிளினிக்கின் (Femma Clinic) மருத்துவ இயக்குனர் டாக்டர் ஆலியா ஜஃபிரா ஜஃபெரி தெரிவித்தார்.
" ஈஸ்ட்ரோஜன் (estrogen) மற்றும் புரோஜெஸ்ட்டிரோன் (progesterone) ஹார்மோன்கள் இருதயப் பாதுகாப்பு மற்றும் கொலஸ்ட்ரால் அளவைக் கட்டுப்படுத்துவதில் முக்கியப் பங்கு வகிக்கின்றன. இந்த ஹார்மோன்களின் அளவு குறையும் போது, பெண்களுக்கு அதிக கொலஸ்ட்ரால், உயர் இரத்த அழுத்தம் மற்றும் நீரிழிவு போன்ற ஆரோக்கியப் பிரச்சினைகள் ஏற்படும் அபாயம் அதிகமாகும்" என அவர் தெரிவித்தார்.
தூக்கக் கோளாறு, எளிதில் கோபப்படுதல், திடீரென உடல் வெப்பமாவது போன்ற உணர்வு (hot flashes), இரவில் வியர்த்தல் மற்றும் உடல் எடை மாற்றம் ஆகியவை பெரிமெனோபாஸின் ஆரம்ப அறிகுறிகளாகும்.
"புரோஜெஸ்ட்டிரோன் என்பது நாம் நிம்மதியாக இரவில் தூங்குவதற்குக் காரணமான ஹார்மோன் ஆகும். எனவே அது குறையும் போது, முதல் அறிகுறியாக இரவில் ஆழமான தூக்கம் இல்லாமல் அடிக்கடி விழிப்பு ஏற்படும்," என்று அவர் விளக்கினார்.
புரதச்சத்து மற்றும் பளு தூக்கும் பயிற்சிகளின் அவசியம்
ஹார்மோன் மாற்றங்களை எதிர்கொள்ள பெண்கள் போதுமான அளவு புரதச்சத்து (protein) மற்றும் நார்ச்சத்துகளை உட்கொள்வதுடன், உடற்பயிற்சிகளையும் செய்ய வேண்டும் என டாக்டர் ஆலியா வலியுறுத்தினார்.
புரதச்சத்து, தசை உருவாக்கத்திற்கு மிக முக்கியம். ஒரு வழிகாட்டியாக, உடலின் ஒவ்வொரு கிலோகிராம் எடைக்கும் தினமும் 1 கிராம் புரதம் தேவை. புரதத்துடன் சேர்த்து நிறைய காய்கறிகளையும் (நார்ச்சத்து) சாப்பிட வேண்டும்.
சாய்வான பரப்பில் நடப்பது (incline walk) மற்றும் பளு தூக்குதல் (strength training) போன்ற பயிற்சிகள் எலும்பு மற்றும் தசை ஆரோக்கியத்திற்கு நல்லது. 5 கிலோ எடையைப் பயன்படுத்தினாலே போதுமானது.
ஹார்மோன் சிகிச்சை: புரிந்து கொள்ள வேண்டும், பயப்படத் தேவையில்லை
ஹார்மோன் மாற்று சிகிச்சை (HRT) என்பது அறிகுறிகளை நிர்வகிக்கவும், இருதய மற்றும் வளர்சிதை மாற்ற அபாயங்களைக் குறைக்கவும் ஒரு சிறந்த தேர்வாகும் என்று டாக்டர் ஆலியா கூறினார்.
இருப்பினும், அனைத்து பெண்களுக்கும் இந்த சிகிச்சை தேவைப்படாது என்பதால், மருத்துவரின் முறையான கண்காணிப்பு மற்றும் ஆலோசனை இல்லாமல் பெண்கள் ஹார்மோன் மாற்று சிகிச்சையை (HRT) எடுத்துக்கொள்ளக் கூடாது என்று அவர் எச்சரித்தார்.
40 வயதிற்குப் பிறகு மருத்துவப் பரிசோதனை அவசியம்
40 வயதைக் கடந்த பெண்கள் ஆண்டுக்கு ஒரு முறையாவது முழுமையான மருத்துவப் பரிசோதனை (முழு இரத்தம், சர்க்கரை, கொலஸ்ட்ரால், சிறுநீரகம் மற்றும் கல்லீரல் செயல்பாடு) செய்துகொள்ள வேண்டும் என்று டாக்டர் ஆலியா பரிந்துரைத்தார்.
"பெரிமெனோபாஸ் மற்றும் மெனோபாஸ் என்பது அனைத்து பெண்களும் கடந்து செல்லும் ஒரு இயற்கையான மாற்றமாகும். இந்த காலகட்டத்தை ஆரோக்கியமாகக் கடக்க, உணவைக் கட்டுப்படுத்தி, சர்க்கரையைக் குறைத்து, புரதத்தை அதிகரித்து, எப்போதும் சுறுசுறுப்பாக இயங்க வேண்டும்," என்று அவர் மேலும் கூறினார்.