ஜூன் 7 அன்று பூச்சோங்கில் 'ஜுவலான் ஏசான் ரஹ்மா' மலிவு விலை விற்பனை: RM12-க்கு அரிசி, RM10-க்கு கோழி ஆகியவை சலுகைகளில் அடங்கும்

ஷா ஆலம், ஜூன் 5: வருகின்ற ஜூன் 7-ஆம் தேதி தாமான் ரெக்ரியாசி வாவாசான் கூடைப்பந்து மைதானத்தில் (Gelanggang Bola Keranjang Taman Rekreasi Wawasan) நடைபெறும் 'ஜுவலான் ஏசான் ரஹ்மா' (JER) மலிவு விலை விற்பனைத் திட்டத்தின் மூலம், பூச்சோங் சுற்றுவட்டார மக்கள் பல்வேறு அன்றாட அத்தியாவசியப் பொருட்களைக் குறைந்த விலையில் பெறுவதற்கான வாய்ப்பைப் பெற்றுள்ளனர்.

வாழ்க்கைச் செலவினங்களின் அதிகரிப்பைத் தொடர்ந்து, மக்களின் அன்றாடச் செலவுச் சுமையைக் குறைப்பதற்கு உதவும் மாநில அரசாங்கத்தின் தொடர்ச்சியான முயற்சிகளில் இந்தத் திட்டமும் ஒன்றாகும் என கின்ராரா சட்டமன்ற உறுப்பினர் இங் ஸி ஹான் தெரிவித்தார்.

"வாழ்க்கைச் செலவினங்களைச் சமாளிக்க மக்களுக்குத் தொடர்ந்து உதவுவதில் மாநில அரசாங்கம் கொண்டுள்ள அக்கறைக்கு இந்த முன்னெடுப்பு ஒரு சான்றாகும்."

"இதில் விற்கப்படும் பொருட்களில் 5 கிலோ அரிசி RM12-க்கும், 2 கிலோ சமையல் எண்ணெய் RM10-க்கும், ஒரு பொட்டலம் மீன் RM6.50-க்கும், ஒரு முழு கோழி RM 10-க்கும், ஒரு பொட்டலம் இறைச்சி RM10-க்கும், 'B' தர முட்டை ஒரு தட்டு RM9-க்கும் மற்றும் ஒரு டின் சார்டின் மீன் RM5.50-க்கும் விற்கப்படும்," என்று அவர் தனது முகநூல் பதிவின் வாயிலாகத் தெரிவித்தார்.

உள்நாட்டு வாணிகம் மற்றும் வாழ்க்கைச் செலவின அமைச்சு (KPDN) மற்றும் சிலாங்கூர் விவசாய மேம்பாட்டுக் கழகம் (PKPS) ஆகியவற்றின் ஒத்துழைப்புடன் செயல்படுத்தப்படும் இத்திட்டம், காலை 9.30 மணி முதல் மதியம் 12.30 மணி வரை நடைபெறும் என்று அவர் கூறினார்.

வழங்கப்படும் பொருட்களின் எண்ணிக்கை வரம்புக்குட்பட்டதாக இருப்பதாலும், உள்ளூர் மக்களிடையே இதற்கு நல்ல வரவேற்பு கிடைக்கும் என எதிர்பார்க்கப் படுவதாலும், பொதுமக்களை முன்கூட்டியே வருமாறு அறிவுறுத்தப்படுகிறார்கள்.

பிங்காஸ் (BINGKAS) எனப்படும் சிலாங்கூர் வளமான வாழ்க்கை உதவித் திட்டம் மற்றும் ரஹ்மா ரொக்க உதவி (STR) பெறுபவர்கள், இந்த விற்பனைத் திட்டத்தின் போது பொருட்களை வாங்குவதற்குத் தங்களின் உதவித் தொகையைப் பயன்படுத்திக் கொள்ளலாம் என்றும் ஸி ஹான் மேலும் தெரிவித்தார்.

மலிவு விலையில் அன்றாட அத்தியாவசியப் பொருட்கள் மக்களுக்குத் தொடர்ந்து கிடைப்பதை உறுதி செய்வதில், மாநில அரசாங்கத்தின் தொடர்ச்சியான கடப்பாட்டின் ஒரு பகுதியாகவே இந்த JER திட்டம் செயல்படுத்தப்படுகிறது.