குடியிருப்பாளர்களின் புகார்களைத் தொடர்ந்து வடிகால் மேம்பாட்டுப் பணிகளை பந்திங் சட்டமன்ற உறுப்பினர் நேரில் ஆய்வு

ஷா ஆலம், மே 31: குடியிருப்பாளர்கள் மற்றும் வியாபாரிகளிடமிருந்து வந்த புகார்களைத் தொடர்ந்து, ஜெஞ்ஜாரோமில் உள்ள நகராட்சி மன்ற கடைகளைச் சுற்றியுள்ள பகுதிகளில் நடைபெறும் வடிகால் மேம்பாட்டுப் பணிகளை பந்திங் சட்டமன்ற உறுப்பினர் (ADN) பாப்பாராய்டு வீரமான் நேரில் சென்று பார்வையிட்டார்.

இந்தத் திட்டம் சுமுகமாக நடைபெறுவதையும், உள்ளூர் சமூகத்திற்கு, குறிப்பாக இப்பகுதியை தினமும் பயன்படுத்தும் வியாபாரிகள் மற்றும் பொதுமக்களுக்கு இது பயனுள்ளதாக அமைவதையும் உறுதி செய்வதற்காக இந்த ஆய்வு மேற்கொள்ளப் பட்டது.

பொதுமக்களின் வசதி மற்றும் பாதுகாப்பு அம்சங்களுக்கு, குறிப்பாக மக்கள் அதிகம் கூடும் இடங்களில், எப்போதும் முன்னுரிமை அளிக்கப்படுவதாக பாப்பாராய்டு தெரிவித்தார்.

அவரது கூற்றுப் படி, இந்தக் கடைப் பகுதி குடியிருப்பாளர்கள் மற்றும் வியாபாரிகள் தங்கள் அன்றாட நடவடிக்கைகளுக்காக அடிக்கடி வந்து செல்லும் முக்கிய இடங்களில் ஒன்றாகும்.

"இந்தக் கடைப் பகுதி குடியிருப்பாளர்கள் மற்றும் வியாபாரிகளின் முக்கிய மையமாகத் திகழ்கிறது. வியாபாரிகள் மற்றும் பார்வையா-ளர்களுக்கு ஏற்படும் அபாயங்களைத் தவிர்க்க, பணி நடைபெறும் இடத்தில் பாதுகாப்பு அம்சங்களில் தீவிர கவனம் செலுத்தப்பட வேண்டும் என்று நான் கேட்டுக்கொள்கிறேன்," என அவர் தனது முகநூலில் குறிப்பிட்டுள்ளார்.

வடிகால் மேம்பாட்டுப் பணிகள் நடைபெறும் காலம் முழுவதும் அனைத்துப் பாதுகாப்பு நடைமுறைகளும் முழுமையாகப் பின்பற்றப் படுவதைத் திட்டத்தை செயல்படுத்துபவர்கள் உறுதி செய்ய வேண்டும் என்றும் அவர் கூறினார்.

அதே வேளையில், அப்பகுதியில் உள்ள வியாபாரிகள் மற்றும் குடியிருப்பாளர்களின் அன்றாட நடவடிக்கைகளைப் பாதிக்காத வகையில், நிர்ணயிக்கப்பட்ட காலக் கெடுவுக்குள் இந்தத் திட்டம் முடிக்கப்படும் என அவர் நம்பிக்கை தெரிவித்தார்.

இத்திட்டம் சீராக நடைபெறுவதை உறுதி செய்ய கோல லங்காட் நகராட்சி மன்றம் (MPKL) தொடர்ந்து கண்காணிப்புப் பணிகளை மேற்கொள்ளும் என்றும் அவர் கேட்டுக்கொண்டார்.