விபத்தில் கீழே விழுந்த மோட்டார் சைக்கிளோட்டி மீது மற்றொரு மோட்டார் சைக்கிள் மோதியதில் உயிரிழப்பு

ஷா ஆலம், மே 31: நேற்று இரவு செகிஞ்சான், சுங்கை நிபோங், பான் 1, ஜாலான் தாலி ஆயர் 11-இல் சாலையோரம் நிறுத்தப்பட்டிருந்த டிராக்டரின் நெல் தொட்டி மீது மோட்டார் சைக்கிள் மோதி கீழே விழுந்த முதியவர் மீது, மற்றொரு மோட்டார் சைக்கிள் மோதியதில் அவர் பரிதாபமாக உயிரிழந்தார்.

இரவு 10 மணியளவில் நடந்த இந்த விபத்தில், பான் 1-லிருந்து பான் 2-ஐ நோக்கி மொடெனாஸ் கிரிஸ் (Modenas Kriss)ரக மோட்டார் சைக்கிளை ஓட்டிச்சென்ற 70 வயது முதியவர் உயிரிழந்தார் என்று சபாக் பெர்ணம் மாவட்ட போலீஸ் தலைவர் சூப்பரின்டெண்டன்ட் எம்.டி யூசோஃப் அஹ்மாட் தெரிவித்தார்.

"சம்பவ இடத்திற்கு வந்ததும், சாலையின் இடது புறத்தில் நிறுத்தப்பட்டிருந்த டிராக்டரின் நெல் தொட்டியின் பின்பக்கத்தை அவர் மோதியதில் அவர் நிலைதடுமாறி கீழே விழுந்துள்ளார்" என்று இன்று தொடர்புகொண்டபோது அவர் கூறினார் என ஹரியான் மெட்ரோ செய்தி வெளியிட்டுள்ளது.

அதே வேளையில், அதே திசையிலிருந்து வந்த யமஹா Y 15 ZR ரக மோட்டார் சைக்கிளோட்டி, கீழே விழுந்த முதியவரைத் தவிர்க்க முடியாமல் அவர் மீது மோதியதாக யூசோஃப் மேலும் கூறினார்.

இந்த விபத்தின் விளைவாக, முதியவரின் முகம் மற்றும் தலையில் பலத்த காயங்கள் ஏற்பட்டன. முகம் மற்றும் தலையில் பலத்த காயம் அடைந்த அவர் சம்பவ இடத்திலேயே உயிரிழந்தது மருத்துவக் குழுவினரால் உறுதி செய்யப்பட்டது.

இதற்கிடையில், விபத்தில் சிக்கிய யமஹா Y15ZR மோட்டார் சைக்கிளோட்டிக்கும் முகத்தில் காயம் ஏற்பட்டுள்ளதால் அவருக்கு மேல் சிகிச்சை அளிக்கப்பட்டு வருகிறது.

இறப்புக்கான காரணத்தைக் கண்டறிய முதியவரின் உடல் பிரேதப் பரிசோதனைக்காக சபாக் பெர்ணம் மருத்துவமனைக்குக் கொண்டு செல்லப்பட்டுள்ளது.

அவரது கூற்றுப்படி, சம்பவ இடத்தில் நிறுத்தப் பட்டிருந்த டிராக்டரின் நெல் தொட்டியின் உரிமையாளர் அடையாளம் காணப்பட்டுள்ளார் மற்றும் விசாரணைகளுக்கு உதவுவதற்காக அவரது வாக்குமூலம் பதிவு செய்யப்பட்டுள்ளது.

"இந்த வழக்கு 1987-ஆம் ஆண்டு சாலைப் போக்குவரத்துச் சட்டம் பிரிவு 41(1)-இன் கீழ் விசாரிக்கப்பட்டு வருகிறது," என்று கூறிய அவர், சம்பவத்தை நேரில் பார்த்த சாட்சிகள் விசாரணைகளுக்கு உதவ இன்ஸ்பெக்டர் சித்தி அத்திகா முகமட் அலியிடம் 013-3328212 என்ற தொலைபேசி எண்ணில் தொடர்பு கொள்ளுமாறு பொதுமக்களைக் கேட்டுக்கொண்டார்.