விருப்பங்களைத் துறந்து, உலகளாவிய விநியோக நெருக்கடியைச் சிக்கனமாக எதிர்கொள்வதும் ஒரு தியாகமே

இஸ்லாமிய நாட்காட்டியின் 12 ஆவதும் இறுதியானதுமான மாதமான துல்ஹிஜ்ஜா, முஸ்லிம்கள் ஆவலுடன் எதிர்பார்க்கும் மாதங்களில் ஒன்றாகும். ஏனெனில், இந்த மாதம் முழுவதும் செய்யப்படும் ஒவ்வொரு வழி பாட்டிற்கும் நற்செயல்களுக்கும் அல்லாஹ் பன்மடங்கு வெகுமதிகளை வழங்குவதாக நம்பப்படுகிறது.

ஒவ்வொரு ஆண்டும் துல்ஹிஜ்ஜா 10ஆம் நாள் கொண்டாடப்படும் ஹஜ் பெருநாள், நபி இப்ராஹிம் மற்றும் அவரது மகன் நபி இஸ்மாயில் ஆகியோரின் தியாகத்தை நினைவுகூரும் வகையில் தியாகத்தின் உண்மையான அர்த்தத்தை இஸ்லாமியர்களுக்குப் போதிக்கிறது. வசதியுள்ள இஸ்லாமியர்கள் இந்நாளில் குர்பானி எனப்படும் தியாக வழிபாட்டை மேற்கொள்கின்றனர்.

இருப்பினும், இன்றைய வாழ்க்கைச் சூழலில், தியாகம் என்பது கால் நடைகளை பலியிடுவதோடு மட்டும் நின்றுவிடுவதில்லை என்று சமய அறிஞர்கள் கூறுகின்றனர். மாறாக, உலகம் மற்றும் நாடு எதிர்கொள்ளும் உலகளாவிய விநியோக நெருக்கடி போன்ற சவால்களை இஸ்லாமியர்கள் எவ்வாறு எதிர்கொள்கிறார்கள் என்பதையும் அது உள்ளடக்கியுள்ளது.

பொருளாதார நெருக்கடியின் சவால்கள்

இது குறித்து கருத்து தெரிவித்த அனைத்துலக இஸ்லாமியப் பல்கலைக்கழகத்தின் அல்-குர்ஆன் மற்றும் அல்-ஹதீஸ் துறை விரிவுரையாளர் முகமது ஹய்கல் இஷாக், புவிசார் அரசியல் நெருக்கடியால் வாழ்க்கைச் செலவு அதிகரித்து வரும் இன்றைய காலகட்டம், இஸ்லாமியர்களிடமிருந்து தியாகத்தைக் கோரும் ஒருவகை சோதனை என்றார்.

"இஸ்லாத்தில், சோதனை என்பது ஒரு துயரம் மட்டுமல்ல, அது மனிதனின் நம்பிக்கை, பொறுமை, ஒற்றுமை மற்றும் இறைபக்தியின் வலிமையை மதிப்பிடும் ஒரு களம். சூரா அல்-பகராவின் 155 ஆவது வசனத்தில் அல்லாஹ் கூறுகிறான்: 'நிச்சயமாக நாம் உங்களை ஓரளவு அச்சத்தாலும், பசியாலும், பொருள்கள், உயிர்கள், விளைச்சல்கள் ஆகியவற்றின் இழப்பினாலும் சோதிப்போம். ஆனால், பொறுமையாளர்களுக்கு நற்செய்தி கூறுவீராக.'"

"இந்த வசனம், பொருளாதார சவால்களும் வாழ்க்கை நெருக்கடிகளும் மனித வாழ்வில் நிச்சயமாக நிகழும் அல்லாஹ்வின் விதியின் (சுன்னத்துல்லாஹ்) ஒரு பகுதி என்பதைக் காட்டுகிறது. ஆனால், அந்தச் சோதனையை ஒருவர் எவ்வாறு எதிர் கொள்கிறார் என்பதே மிக முக்கியம்," என்று அவர் சமீபத்தில் பெர்னாமாவிடம் கூறினார்.

தற்போதைய உலகளாவிய விநியோக நெருக்கடியின் பின்னணியில், இஸ்லாமியர்களிடமிருந்து கோரப்படும் தியாகங்களில் செல்வம், நேரம், ஆற்றல் மற்றும் சுயநலம் ஆகியவற்றைக் கைவிட்டு மற்றவர்களுக்கு உதவுவதும், மனிதாபிமான விழுமியங்களைப் பாதுகாப்பதும் அடங்கும் என்று முகமது ஹய்கல் குறிப்பிட்டார்.

உதாரணமாக, பலர் நிதி நெருக்கடியை எதிர்கொள்ளும் போது, இஸ்லாமை பின்பற்றுபவர்களுக்குத் தொடர்ந்து தர்மம் செய்ய, அண்டை வீட்டாருக்கு உதவ, குடும்ப நலனைக் காக்க மற்றும் சுயநலமின்றி இருக்கக் கற்பிக்கிறது என்றார் அவர்.

"மேலும், இந்த புவிசார் அரசியல் பதற்றத்தின் போது தியாகம் என்பது நன்னெறி மற்றும் உணர்ச்சி ரீதியானது. வாழ்க்கை அழுத்தங்களால் மக்கள் எளிதில் மன அழுத்தத்திற்கும் கோபத்திற்கு ஆளாகும் சூழலில், இஸ்லாமியர்கள் பொறுமையாக இருக்கவும், ஒழுக்கத்தைப் பேணவும், மன ஆசைகளைக் கட்டுப்படுத்தவும், சுயநலத்திற்காக மற்றவர்களை ஒடுக்காமல் இருக்கவும் அறிவுறுத்தப்படுகிறார்கள்."

"ஹஜ் பெருநாள், உண்மையான தியாகம் என்பது விலங்குகளை அறுப்பது மட்டுமல்ல, பேராசை, அகங்காரம், தன்னலம் மற்றும் உலகத்தின் மீதான அதீத பற்று போன்ற குணங்களை 'அறுத்து' எறிய மனிதன் தயாராக இருப்பதே என்பதை நினைவூட்டுகிறது. சில சமயங்களில், நாமே சிரமத்தில் இருக்கும் போது மற்றவர்களின் தேவைகளுக்கு முன்னுரிமை அளிப்பதே மிகப் பெரிய தியாகம்," என்றார் அவர்.

அதே நேரத்தில், உலகின் பல பகுதிகளில் நடக்கும் போர்களும் மனிதகுலத்தின் துன்பங்களும் சமூக ஒற்றுமை மற்றும் உலகளாவிய மனிதாபிமானத்தின் முக்கியத்துவத்தை ஒருவருக்குக் கற்பிக்கின்றன என்றும் அந்த அறிஞர் கூறினார்.

"நபிகள் நாயகம் (ஸல்) அவர்கள் கூறினார்கள்: 'நம்பிக்கையாளர்கள் ஒருவருக்கொருவர் அன்பு செலுத்துவதிலும், இரக்கம் காட்டுவதிலும் ஒரே உடலைப் போன்றவர்கள்; ஒரு உறுப்பு பாதிக்கப் பட்டால், உடல் முழுவதும் வலியால் பாதிக்கப்பட்டு இரவில் விழித்திருக்கும்.' (புகாரி மற்றும் முஸ்லிம் அறிவித்த ஹதீஸ்). இது இன்றைய காலகட்டத்திற்கு மிகவும் பொருத்தமானது. மற்ற சமூகங்களின் துன்பங்களைப் பொருட்படுத்தாமல் இஸ்லாமியர்கள் தங்களைப் பற்றி மட்டுமே சிந்தித்து வாழ முடியாது," என்றார் அவர்.

எனவே, உலகளாவிய நெருக்கடியை எதிர்கொள்ளும் வேளையில், ஹஜ் பெருநாள் சமூகத்தின் வலிமை பொருளாதாரம் அல்லது தொழில்நுட்பத்தில் மட்டும் தங்கியிருக்கவில்லை, மாறாக பொறுமை, தியாகம், சகோதரத்துவம் மற்றும் அல்லாஹ்வின் மீதான நம்பிக்கை ஆகியவற்றில் தங்கியுள்ளது என்ற செய்தியைத் தருகிறது. ஏனெனில் இந்த விழுமியங்கள் நவீன உலகின் சவால்களை எதிர்கொள்ள சமூகத்தை வலிமையாகவும், நெகிழ்ச்சியுடனும் மாற்ற உதவும்.

நபி இப்ராஹிம் மற்றும் இஸ்மாயிலின் தியாகத்தைப் புரிந்துகொள்ளுதல்

நபி இப்ராஹிம் மற்றும் நபி இஸ்மாயிலின் தியாகத்தை உதாரணமாகக் காட்டிய அவர், அந்த இரு நபிமார்களின் தியாக உணர்வை ஒரு வரலாற்று நிகழ்வாக மட்டும் பார்க்காமல், எல்லா காலத்திற்கும் மிகவும் பொருத்தமான நம்பிக்கை மற்றும் வாழ்க்கைக்கான கல்வி மாதிரியாகப் புரிந்து கொள்ள வேண்டும் என்றார்.

"இன்றைய நவீன காலத்தில், மனிதனின் சவால்கள் வேறுபட்டிருக்கலாம். ஆனால் சோதிக்கப் படும் விழுமியங்கள் ஒன்றே. அதாவது, ஒருவன் தனது சுயவிருப்பம், மன ஆசைகள் மற்றும் உலகப் பற்றை விட அல்லா ஹ்விற்கு எவ்வளவு தூரம் முன்னுரிமை கொடுக்கிறான் என்பதேயாகும்."

"நபி இப்ராஹிமின் கதை, ஒரு கட்டளை உணர்ச்சி ரீதியாகவும் மனித தர்க்கத்தின்படியும் மிகவும் கடினமாக இருந்தாலும், அல்லாஹ்விற்கு முழுமையாகக் கீழ்ப் படிவதைப் பற்றி நமக்குக் கற்பிக்கிறது. நபி இஸ்மாயில், கீழ்ப்படிதல், பொறுமை மற்றும் அல்லாஹ்வின் ஞானத்தில் முழு நம்பிக்கை வைக்கும் தன்மையைக் காட்டினார். பொருள், புகழ் மற்றும் தனிப்பட்ட நலன்களை வெற்றிக்கான அளவுகோலாகக் கருதும் இன்றைய உலகில் இது மிகவும் முக்கியமானது."

"நவீன வாழ்க்கையில், இந்த தியாக உணர்வை பல்வேறு வடிவங்களில் வெளிப்படுத்தலாம். உதாரணமாக, சமூக மற்றும் தொழில்நுட்ப சவால்களை எதிர்கொண்ட போதிலும், பெற்றோர் தங்கள் குழந்தைகளுக்கு மதக் கல்வியை வழங்குவதில் செய்யும் தியாகம், சமூகத்திற்கு உதவ நேரம் மற்றும் ஆற்றலைத் தியாகம் செய்தல், மதக் கொள்கைகளைக் காக்க தடைசெய்யப்பட்ட விஷயங்களைக் கைவிடுதல், மன ஆசைகள் மற்றும் சுயநலத்தைக் கட்டுப் படுத்தத் தயாராக இருத்தல் போன்றவை," என்றார் அவர்.

மடாணி அரசாங்கம் BUDI 95 போன்ற சிக்கன நடவடிக்கைகளைச் செயல்படுத்துவது குறித்து கருத்து தெரிவித்த முகமது ஹய்கல், மதத்தில் சிக்கனம் மற்றும் செலவினங்களை விவேகமாகக் கட்டுப்படுத்துவது ஒரு வகையான தியாகம் என்றும், குறிப்பாக சவாலான பொருளாதாரச் சூழலில் ஒரு இஸ்லாமியரின் பொறுப்புணர்வின் அடையாளம் என்றும் கூறினார்.

இஸ்லாம் தனது பின்பற்றுபவர்களை வரம்புகளின்றி ஆடம்பரமாக வாழவோ அல்லது அதிகமாகச் செலவு செய்யவோ கற்பிக்கவில்லை என்று அவர் கூறினார். மாறாக, மதம் எளிமை, சமநிலை மற்றும் அருட்கொடைகளை நம்பிக்கையுடன் நிர்வகிக்கும் கருத்தை வலியுறுத்துகிறது.

"சூரா அல்-இஸ்ராவின் 26-27 வசனங்களில் அல்லாஹ் கூறுகிறான்: 'மேலும், நீங்கள் வீண் விரயம் செய்யாதீர்கள். நிச்சயமாக வீண் விரயம் செய்பவர்கள் ஷைத்தான்களின் சகோதரர்களாவர்.' இந்த வசனம், வீண் விரயம் என்பது ஒரு பொருளாதாரப் பிரச்சினை மட்டுமல்ல, அது ஒரு ஒழுக்க மற்றும் ஆன்மீகப் பிரச்சினையும் கூட என்பதைக் காட்டுகிறது," என்றார் அவர்.

சமூகம் வாழ்க்கைச் செலவு அழுத்தங்களை எதிர்கொள்ளும் நிலையில், தன்னையும், குடும்பத்தையும், சமூகத்தையும் பாதுகாக்கும் எண்ணத்துடன் செய்யப்படும் சிக்கனப் பழக்கம் ஒரு வழிபாடாக மாறும் என்று அவர் கூறினார்.

"ஒருவர் தேவையற்ற செலவுகளைக் குறைக்கும் போது, எரிபொருள் பயன் பாட்டைக் கட்டுப் படுத்தும்போது, பயன்பாட்டுச் செலவுகளில் சிக்கனமாக இருக்கும்போது அல்லது மிக முக்கியமான தேவைகளுக்காக சில ஆசைகளைத் தள்ளிப்போடும்போது, அதுவும் ஒரு வகையான தியாகம்தான்."

"குறிப்பாக அந்தச் சேமிப்பு, ஒருவருக்குக் குடும்பத்திற்கு உதவ, பெற்றோருக்குப் பங்களிக்க அல்லது தேவைப்படுபவர்களுடன் வருமானத்தைப் பகிர்ந்து கொள்ள உதவும்போது, அதன் மதிப்பு மேலும் அதிகரிக்கிறது," என்றார் அவர்.

தியாகம் என்பது எப்போதும் பெரிய அல்லது அசாதாரணமான செயல்களைச் செய்வதாக இருக்க வேண்டியதில்லை என்றும், சில சமயங்களில் சுயவிருப்பத்தைக் கட்டுப்படுத்துதல், தேவைகளுக்கு முன்னுரிமை அளித்தல், எளிமையாக வாழ்தல் போன்ற சிறிய, தொடர்ச்சியான தியாகங்கள் ஆன்மாவைப் பயிற்றுவிப்பதில் மிகவும் முக்கியமானவை என்றும் ஹஜ் பெருநாள் கற்பிக்கிறது என முகமது ஹய்கல் கூறினார்.

தியாகத்தின் அர்த்தம்

இதற்கிடையில், மலாயாப் பல்கலைக்கழகத்தின் இஸ்லாமியக் கல்வி அகாதமியின் ஷரியா மற்றும் பொருளாதாரத் துறைத் தலைவர் டாக்டர் முகமது ஷாஹிட் முகமது நோ கூறுகையில், குர்பானி என்பது துல்ஹிஜ்ஜா மாதத்தில் குறிப்பிட்ட விலங்குகளை அறுத்து, அதன் இறைச்சியைத் தகுதியானவர்களுக்குப் பகிர்ந்தளிப்பதாகும் என்றார்.

குர்பானி என்பது ஒருவரை அல்லாஹ்விடம் நெருங்கச் செய்யும் ஒரு வழிபாடு மட்டுமல்ல, அது ஒரு அடியானின் தியாகத்தின் வெளிப்பாடாகவும், வருமானத்தைப் பகிர்வதன் மூலம் மனிதர்களிடையே உறவை வலுப்படுத்தவும் உதவுகிறது என்று அவர் குறிப்பிட்டார்.

"செல்வம் என்பது அல்லாஹ்வின் அருட்கொடை. அது மனிதர்களிடையே ஒற்றுமையையும் பிணைப்பையும் ஏற்படுத்த வேண்டுமே தவிர, பிளவுக்கோ அல்லது நெருக்கடிக்கோ காரணமாக அமையக்கூடாது. நபி இப்ராஹிம் மற்றும் அவரது மகனின் கதை, அல்லாஹ்வால் ஒப்படைக்கப்பட்ட விலைமதிப்பற்ற அருட்கொடைகள் அல்லது சொத்துக்களைத் தியாகம் செய்ய நேர்ந்தாலும், அல்லாஹ்வின் கட்டளைகளுக்கு எவ்வளவு பெரிய கீழ்ப்படிதலை வழங்க வேண்டும் என்பதற்குப் போதுமான சான்றாகும்."

"குர்பானி அல்லது உத்ஹியா என்பது ஒரு குறிப்பிட்ட வழிபாடு. இருப்பினும், தியாகம் என்ற கருத்து நம் வாழ்வில் ஒவ்வொரு நாளும் நிகழ்கிறது. இங்கு குறிப்பிடப்படும் தியாகம் என்பது அல்லாஹ்வின் கட்டளைகளுக்குக் கீழ்ப்படிவதாகும், இது இறுதியில் மனிதர்களுக்கு நன்மையைத் தரும்," என்று அவர் பெர்னாமாவிடம் கூறினார்.

தியாகத்தை தற்போதைய உலகளாவிய விநியோக நெருக்கடியுடன் தொடர்புபடுத்திப் பேசிய அவர், தேவைப்படுபவர்களுக்கு உதவிக்கரம் நீட்டுவது ஒரு வகையான தியாகம் என்றார்.

"இஸ்லாம் முன்வைக்கும் பொருளாதாரத்தின் யதார்த்தம், ஸகாத் மற்றும் வகாஃப் போன்றவற்றின் மூலம் செல்வத்தைப் பகிர்வதாகும். மேலும், ஒவ்வொரு ஆண்டும் இஸ்லாமியர்களின் பாரம்பரியமாக இருந்து வரும் குர்பானி பழக்கமும் இதையே காட்டுகிறது. இவை அனைத்தும், செல்வம் குறிப்பிட்ட சிலரிடம் குவிக்கப்படாமல், சுழற்சியில் இருக்க வேண்டும் என்பதையும், மற்றவர்களைத் துன்பத்தில் விடக்கூடாது என்பதையும் காட்டுகின்றன," என்றார் அவர்.

சிக்கனம் என்பது ஒரு குறிப்பிட்ட காலத்திற்குரிய பழக்கம் அல்ல, மாறாக அது ஒரு வழக்கமாக மாற்றப்பட வேண்டிய ஒன்று என்று முகமது ஷாஹிட் கூறினார்.

"தற்போது நடப்பவை, அருட்கொடைகளுக்கான நமது நன்றியுணர்வையும், நம் மீது சுமத்தப்பட்டுள்ள அருட்கொடைகளுக்கான பொறுப்புணர்வையும் வெளிப்படுத்த ஒரு வாய்ப்பை வழங்குகிறது. ஒவ்வொரு மனிதனுக்கும் தேவைகள் உள்ளன, மேலும் இஸ்லாம் மனிதர்கள் நடுநிலையான (வஸாத்தியா) கட்டமைப்பிற்குள் இருக்கும் அருட்கொடைகளை அனுபவிக்க அனுமதிக்கிறது."

"கேளிக்கைக்காக மட்டும் பயணம் செய்வதை அல்லது ஆடம்பரமாக வாழ்வதைத் தவிர்ப்பது நெருக்கடி காலங்களில் மட்டுமல்ல, சாதாரண காலங்களிலும் ஒரு தேவையாகும். இருப்பினும், ஆடம்பரம் என்பதன் பொருள் ஒருவரின் பொருளாதார நிலையைப் பொறுத்து மாறுபடலாம்," என்றார் அவர்.