சிங்கப்பூர் பொது பூப்பந்து விருதை தற்காக்க ஆரோன்-வூய் யிக் நம்பிக்கை

சிங்கப்பூர்: நாட்டின் முன்னணி ஆண்கள் இரட்டையர் ஜோடியான ஆரோன் சியா-சோ வூய் யிக், இந்த செவ்வாய்க்கிழமை தொடங்கவிருக்கும் சிங்கப்பூர் பொது விருது 2026 பூப்பந்து போட்டியில் தங்களின் பட்டத்தை வெற்றிகரமாகத் தற்காத்துக் கொள்ள முடியும் என்று நம்பிக்கை தெரிவித்துள்ளனர்.

சமீபத்தில் நடைபெற்ற மலேசியா மாஸ்டர்ஸ் 2026 போட்டியில் ஏற்பட்ட ஏமாற்றத்தைத் தொடர்ந்து, இம்முறை சிறந்த ஏற்பாடுகளுடன் இப்போட்டியில் களமிறங்குவதாக ஆரோன் கூறினார்.

"நிச்சயமாக, கடந்த ஆண்டு வென்ற பட்டத்தை தற்காக்க நாங்கள் நம்புகிறோம், அதற்காக முழுமையான தயாரிப்புடன் இங்கு வந்துள்ளோம். எங்களுக்குள் அதிக அழுத்தத்தை ஏற்படுத்திக் கொள்ள நாங்கள் விரும்பவில்லை, ஒவ்வொரு போட்டியாக எதிர்கொள்வோம்," என்று ஆரோன் இன்று ஒரு செய்தியாளர் சந்திப்பில் தெரிவித்தார்.

உலகின் இரண்டாம் நிலை ஆட்டக்காரர்களான இவர்கள், சிங்கப்பூர் பொது விருது 2026-க்கான தங்களின் முதல் சுற்றில் பிரான்சின் சகோதரர்களான கிறிஸ்டோ மற்றும் டோமா ஜூனியர் போபோவ் ஜோடியை இந்த செவ்வாய்க்கிழமை எதிர்கொள்கின்றனர்.

இப்போட்டியில் உலகின் முதல் நிலை ஜோடியான தென்கொரியாவின் கிம் வோன் ஹோ-சியோ சியுங் ஜே-வை சந்திக்கும் வாய்ப்பு குறித்து கேட்டபோது, அந்த ஜோடியை எதிர்கொண்டால் தங்களின் ஆட்ட உத்தியை அதற்கேற்ப மாற்றியமைப்போம் என்று வூய் யிக் கூறினார்.

"நாங்கள் அவர்களுக்கு எதிராக பலமுறை விளையாடியுள்ளோம், உண்மையில் பெரிய வித்தியாசங்கள் இல்லை. நாங்கள் மேம்படுத்த வேண்டிய ஒரு முக்கிய அம்சம் உள்ளது, சிங்கப்பூர் பொது விருது 2026-ல் அவர்களை வீழ்த்துவோம் என்று நம்புகிறோம்," என்றார் அவர்.

இவ்வாண்டு சிங்கப்பூர் பொது விருது போட்டியில் மலேசிய அணிக்கு, நடப்பு ஆண்கள் இரட்டையர் வெற்றியாளர்களான ஆரோன்-வூய் யிக் தலைமை தாங்குகின்றனர்.

மலேசியாவின் சார்பில், மகளிர் இரட்டையர் பிரிவில் உலகின் இரண்டாம் நிலை வீராங்கனைகளான பெர்லி டான்-எம். தீனா, கலப்பு இரட்டையர் பிரிவில் உலகின் மூன்றாம் நிலை ஜோடியான சென் டாங் ஜி-டோ ஈ வெய் மற்றும் மற்றொரு தொழில்முறை ஆண்கள் இரட்டையர் ஜோடியான கோ ஸே ஃபெய்-நூர் இசுடின் ரும்சானியும் முக்கிய போட்டியாளர்களாக களமிறங்குகின்றனர்.