கம்பார், ஏப்ரல் 11: அரசு ஊழியர்களுக்கு நடைமுறைப்படுத்தப்பட்டுள்ள 'வீட்டிலிருந்து வேலை செய்யும்' (WFH) கொள்கையினால் உற்பத்தித்திறன் எவ்விதத்திலும் பாதிக்கப்படாது என்றும், மாறாகத் தெளிவான முக்கியச் செயல்திறன் குறிகாட்டிகள் (KPI) மூலம் இது செயல்திறனை மேலும் அதிகரிக்கும் என பொதுச் சேவைத் துறை (JPA) தெரிவித்துள்ளது.
இது குறித்துப் பொதுச் சேவைத் துறை இயக்குநர் ஜெனரல் டான் ஸ்ரீ வான் அகமட் டலான் அப்துல் அஜிஸ் கூறுகையில், வீட்டிலிருந்து பணியாற்றும் ஒவ்வொரு அதிகாரியும் தங்களுக்கு நிர்ணயிக்கப்பட்ட இலக்குகளை (KPI) அந்தந்தக் காலக்கட்டத்திற்குள் முறையாக நிறைவு செய்வது கட்டாயமாகும் என்று தெரிவித்தார்.
இந்த முறைமை மிகவும் திட்டமிடப்பட்ட முறையில் வகுக்கப்பட்டுள்ளதால், அலுவலகப் பணிகள் தடையின்றிச் சீராக நடைபெறுவது உறுதி செய்யப்பட்டுள்ளது.
வேலைப்பகிர்வு மற்றும் அதன் முடிவுகளை ஆய்வு செய்வதற்கு எனத் தனித்தனி நாட்கள் ஒதுக்கப்பட்டுள்ளதை அவர் விளக்கினார்.
"உதாரணமாக, ஞாயிற்றுக்கிழமை வார விடுமுறை கொண்ட மாநிலங்களில், திங்கட்கிழமைகளில் வீட்டிலிருந்து வேலை செய்ய அனுமதி இல்லை. அன்றைய தினம் அதிகாரிகளுக்குப் பணிகளை ஒதுக்குவதற்காகப் பயன்படுத்தப்படும். செவ்வாய் முதல் வியாழன் வரை நிர்ணயிக்கப்பட்ட இலக்குகளை அவர்கள் எட்ட வேண்டும்.
அதேபோல், வெள்ளிக்கிழமைகளிலும் வீட்டிலிருந்து வேலை செய்ய அனுமதி கிடையாது; ஏனெனில் அன்றைய தினம் மேற்பார்வையாளர்கள் அதிகாரிகளின் வேலை முடிவுகளை ஆய்வு செய்வார்கள்," என்று அவர் கூறினார்.
இன்று கோத்தா பாரு தேசியப் பள்ளியில் நடைபெற்ற 'கம்போங் அங்காட் மடாணி' மற்றும் 'செக்கோலா அங்காட் மடாணி' (Kampung & Sekolah Angkat MADANI) திட்டத் தொடக்க விழாவில் கலந்து கொண்ட பின்னர் செய்தியாளர்களிடம் அவர் இதனைத் தெரிவித்தார்.
உலகளாவிய எரிசக்தி நெருக்கடிக்குத் தீர்வாக இந்த வீட்டிலிருந்து வேலை செய்யும் முறை அறிமுகப்படுத்தப்பட்ட நிலையில், இதனால் உற்பத்தித்திறன் குறையக்கூடும் என்ற அச்சத்திற்கு அவர் இவ்வாறு விளக்கமளித்தார்.
மேலும், அரசு ஊழியர்கள் வீட்டிலிருந்து வேலை செய்யும் போது அவர்களைக் கண்காணிக்க 'ஸ்பாட்-மீ' (SPOT-Me) எனும் பிரத்யேகச் செயலி பயன்படுத்தப்படுவதால், பணியில் மெத்தனமாக இருக்க வாய்ப்பில்லை என்றும் அவர் குறிப்பிட்டார்.
இந்தச் செயலியின் மூலம் ஊழியர்கள் ஒவ்வொரு மணிநேரமும் தங்களின் வருகையைப் பதிவு செய்ய வேண்டும். தேசிய டிஜிட்டல் துறையினால் நிர்வகிக்கப்படும் இந்தத் தொழில்நுட்பம் மூலம் ஊழியர்கள் தொடர்ந்து கண்காணிக்கப்படுவதால், அவர்கள் வேலையைத் தட்டிக்கழிக்க முடியாது என்று அவர் உறுதிபடக் கூறினார்.
இந்தத் திட்டமானது ஊழியர்களிடையே பெரும் வரவேற்பைப் பெற்றுள்ளது. குறிப்பாகப் போக்குவரத்துச் செலவு உள்ளிட்ட தினசரி வாழ்வாதாரச் செலவுகளைக் குறைக்க இது உதவுவதாகப் பெரும்பாலான அரசு ஊழியர்கள் கருத்து தெரிவித்துள்ளனர்.
முதலாளிக்கும் ஊழியருக்கும் இடையிலான நம்பிக்கை மற்றும் முதிர்ச்சியான அணுகுமுறையே இத்திட்டத்தின் வெற்றிக்கு அடிப்படை என்றும் வான் அகமட் மேலும் தெரிவித்தார்.
