கிள்ளான், ஏப்ரல் 1: கிள்ளான் அரச மாநகரசபை (MBDK) ஏற்பாட்டில் நடைபெற்ற பயன்படுத்தப்பட்ட ஆடைகள் ('ப்ரீலவ்ட்') விற்பனை முயற்சி, மறுசுழற்சி கலாச்சாரத்தை ஊக்குவிப்பதோடு, மாற்றுத்திறனாளிகள் சங்கம் (OKU) மற்றும் அரசு சாரா அமைப்புகளுக்கு (NGO) நிதி திரட்டவும் உதவுகிறது.
‘பசார் லேவா’ எனும் கருப்பொருளில் நடைபெற்ற இந்த நிகழ்ச்சி, பயன்படுத்தப்பட்ட ஆடைகள் மீதான சமூகத்தின் கண்ணோட்டத்தை மாற்றி, அவை மிகவும் மதிப்புமிக்கவை மற்றும் மீண்டும் பயன்படுத்தத் தகுந்தவை என்பதை உணர்த்தும் நோக்கில் அறிமுகப் படுத்தப்பட்டதாக MBDK-வின் நிறுவனத் தொடர்புத் துறை இயக்குநர் நோர்ஃபிசா மஹ்ஃபிஸ் கூறினார்.
"மறுசுழற்சி தினத்தை முன்னிட்டு, சாலையோரங்களிலோ அல்லது பெட்டிகளிலோ ஆடைகளை வீசி எறிந்து, அதனால் ஏற்படும் புகார்களைத் தவிர்க்கும் நோக்கில் பொது மக்களுக்கு கல்வி புகட்ட MBDK இந்த 'பசார் லேவா' திட்டத்தை உருவாக்கியது. "ஆடைகளை நேர்த்தியாக மடித்து வைக்கும் அணுகுமுறை, மறுசுழற்சி செய்யப்பட்ட பொருட்களின் மீதான மக்களின் மதிப்பீட்டை அதிகரிக்கும்," என்று அவர் மீடியா சிலாங்கூரிடம் தெரிவித்தார்.
மகளிர் தினக் கொண்டாட்டத்தின் ஒரு பகுதியாக நடைபெற்ற இந்த நிகழ்ச்சியில், கிள்ளான் மாநகர முதல்வர் டத்தோ அப்துல் ஹமீத் ஹுசைன் மற்றும் அவரது துணைவியாரும் தங்களின் தனிப்பட்ட ஆடைகளை நன்கொடையாக வழங்கியது ஒரு சிறப்பம்சமாகும்.அதுமட்டுமின்றி, பாத்திக் மற்றும் பொத்திக் ஆடைகள் உட்பட சுமார் 300 ஆடைகள் பொதுமக்களிடமிருந்து நன்கொடையாகப் பெறப்பட்டன.
இந்த விற்பனையின் மூலம் கிடைக்கும் வருமானம், பெருநிறுவன சமூகப் பொறுப்பின் (CSR) ஒரு பகுதியாக மாற்றுத்திறனாளிகள் சங்கங்களுக்கும் அரசு சாரா அமைப்புகளுக்கும் வழங்கப்படும் என்று நோர்ஃபிசா கூறினார்.மேலும், இந்த முயற்சியை வலுப் படுத்த பல இன சமூகத்தினரின் பங்களிப்பை விரிவுபடுத்துவதோடு, பல சங்கங்கள் மற்றும் நிறுவனங்களுடன் இணைந்து செயல்படவும் MBDK திட்டமிட்டுள்ளது.
கிள்ளான் சமூகத்தை மேலும் நீடித்த நிலை தன்மையுடனும் போட்டி தன்மையுடனும் உருவாக்குவதற்காக, மறுசுழற்சி அம்சம் MBDK-வின் ஒவ்வொரு திட்டத்திலும் தொடர்ந்து இணைக்கப்படும் என்றும் நோர்ஃபிசா வலியுறுத்தினார்.
