16 வயதுக்குட்பட்ட சிறுவர்கள் சமூக ஊடகங்களைப் பயன் படுத்துவதற்கு இந்தோனேசியாவில் தடை

ஜகார்த்தா, மார்ச் 28: 16 வயதுக்குட்பட்ட சிறுவர்கள் சமூக ஊடகங்களைப் பயன் படுத்துவதற்கு இந்தோனேசியா சனிக்கிழமை அதிகாரப்பூர்வமாகத் தடை விதித்துள்ளது.

பாதுகாப்பான மற்றும் ஆரோக்கியமான டிஜிட்டல் சிறார்களுக்கான நிர்வாகக் கொள்கை (Tunas) என்ற டிஜிட்டல் பாதுகாப்பு விதிமுறைகளை அமல்படுத்தியதைத் தொடர்ந்து இந்த நடவடிக்கை எடுக்கப் பட்டுள்ளது. இந்த விதிமுறைகளின்படி, அதிக ஆபத்துள்ள தளங்களில் வயதுக்குட்பட்ட பயனர்களின் கணக்குகளைப் படிப்படியாகச் செயலிழக்கச் செய்வது கட்டாயமாக்கப் பட்டுள்ளது.

சமீபத்திய பிராந்திய விதிமுறைகளின் அடிப்படையில், இத்தகைய தடையை நாடு தழுவிய அளவில் அமல்படுத்திய முதல் மேற்கத்தியரல்லாத நாடு இந்தோனேசியா ஆகும்.

அதிபர் பிரபோவோ சுபியாந்தோ இந்த விதிமுறையில் கையெழுத்திட்ட பின்னர், ஒரு வருட கால அவகாசத்திற்குப் பிறகு இந்த அமலாக்கம் வந்துள்ளது. இது டிஜிட்டல் இறையாண்மை மற்றும் குழந்தைகளின் பாதுகாப்பில் இந்தோனேசியாவின் உறுதியை பிரதிபலிக்கிறது என்று தொடர்பு மற்றும் டிஜிட்டல் விவகார அமைச்சர் மியூத்யா ஹஃபிட் கூறினார்.

மின்னணு அமைப்பு (PSE) இணக்க உறுதிமொழிகள் மற்றும் செயல் திட்டங்களைச் சமர்ப்பிப்பது உட்பட, விதிமுறைகளுக்கு ஏற்பச் செயல்பட அரசாங்கம் போதுமான கால அவகாசம் வழங்கியதாக அவர் கூறினார்.

"இணக்கத்தின் அளவை அடிப்படையாகக் கொண்டு, அதன் நிலை மாறும் தன்மையுடையது என்று நாங்கள் கூறலாம். இன்று இரவு வரை உள்ள நிலையை நாங்கள் அறிவிக்கிறோம், நாளை வரை முன்னேற்றங்களுக்காகக் காத்திருக்கிறோம்," என்று அவர் வெள்ளிக்கிழமை ஒரு செய்தியாளர் சந்திப்பில் கூறினார்.

அந்த செய்தியாளர் சந்திப்பின் காணொளி அமைச்சின் யூடியூப் கணக்கில் பதிவேற்றப் பட்டது.

இணக்கத்தில் எந்த சமரசமும் இருக்காது என்று வலியுறுத்திய மியூத்யா, இந்தோனேசியாவில் செயல்படும் அனைத்து டிஜிட்டல் தளங்களும் நாட்டின் சட்டங்களுக்குக் கட்டுப்பட வேண்டும் என்று கூறினார்.

"இந்தோனேசியாவில் செயல்படும் ஒவ்வொரு வர்த்தக நிறுவனமும் இந்த நாட்டின் சட்டங்களுக்குக் கட்டுப்படுவது கட்டாயமாகும் என்பதை நாங்கள் வலியுறுத்துகிறோம்."

PP Tunas-இன் அமலாக்கம் படிப்படியாக மேற்கொள்ளப்படும் என்றும், முக்கிய தளங்களில் தொடங்கி, படிப்படியாக அமலாக்கம் விரிவுபடுத்தப்படும் என்றும் அமைச்சகம் தெரிவித்துள்ளது.

அரசாங்கத்தின் அமலாக்க நிலைப்பாட்டை மீண்டும் வலியுறுத்திய மியூத்யா, தற்போதுள்ள சட்டங்களுக்கு இணங்காத தளங்களுக்கு எதிராக நடவடிக்கை எடுக்க அதிகாரிகளுக்கு முழு அதிகாரம் உள்ளது என்றார்.

"பொருந்தக் கூடிய சட்டங்கள் மற்றும் விதிமுறைகளின்படி அமலாக்க நடவடிக்கைகளை எடுக்க அரசாங்கத்திற்கு அதிகாரம் உள்ளது," என்று அவர் கூறினார்.

-- பெர்னாமா